Diego de Cuba di STA: Situacion financiero di SERLIMAR ta hopi penoso

168
ORANJESTAD,–Sindicato STA, kende ta e representante di e trahadonan, tabatin un reunion diahuebs ultimo cu e Management Team nobo di SERLIMAR y pa scucha di nan banda, cual ta e maneho cu ta bay wordo hiba.

Diego de Cuba, Presidente di STA, den un declaracion riba e encuentro aki, a cuminsa pa bisa cu tur hende sa e situacion penoso di SERLIMAR pa cual e ta lamenta loke cu a sosode aki e ultimo añanan. Pero poniendo esey un banda, e ta bisa, aworaki tin un situacion unda cu ta papia di ladronicia y fraude cu a tuma luga pa cual e sindicato tabata kier sa exactamente kico a pasa. “Nos a lesa hopi cos den prensa y nos tabata kier sa kico di berdad tin den tur e publicacionnan aki,” de Cuba a bisa.

Tambe e sindicalista tabata kier sa di e empleadonan cu a wordo kita for di trabou pero cu despues a tuma nota cu nan wordo tuma bek na trabou. E ta haya cu ta na su luga pa sindicato haya un splicacion di con ta kita personanan for di trabou y kico a haci cu a bolbe tuma nan bek den servicio. E splicacion cu STA a haya for di Management Team ta cu nan a deduci cu tabatin persecucion politico di parti di e partido AVP, Benny Sevinger y Mike de Meza, kendenan tabata persigui e personanan aki huridicamente. “Ta deduci esaki, pasobra nan ta e dos Minister cu tabata responsabel.”

Ademas di e problema ariba menciona, STA a wordo informa tambe cu SERLIMAR debe un cantidad di belasting, pa cual nan a wordo informa cu tin un plan pa recupera esaki. Na mesun momento e ta nifica cu Gobierno mester bay inverti basta placa den e departamento aki si nan kier logra recupera e placa cu nan mester haya. STA ta lamenta cu ex Minister Sevinger di un forma rapido a pusha 52 ploeg den Serlimar, cual ta nifica 156 persona cu a causa un peso enorme riba e presupuesto di SERLIMAR. Esaki, e ta bisa, ta un blunder di e ex mandatario sabiendo cu e situacion di SERLIMAR no tabata coy canta macamba. STA ta di acuerdo cu e “core business” di SERLIMAR no ta pa corta mata banda di caminda. Tin comprension pa e hendenan cu ta traha banda di caminda, pero lo mester wordo resorta bou di un otro departamento, kisas den loke tabata conoci antes como TAV. Si e keda manera e ta awor, e lo keda pisa riba e presupuesto di SERLIMAR, cual no ta saludabel pa e compania. “Situacion financiero di SERLIMAR ta penoso y a bira  mas penoso cu e hecho aki. Gobierno mester tuma decision si ta bay pomp cantidad di placa den SERLIMAR. Di otro banda mester bay cuminsa cobra pa recoge sushi, niun hende por scapa di esaki. Mayoria parti na mundo ta paga pa esaki. Si nos ta di acuerdo cu mester bini tarifa social pa esnan di menos recurso y pensionado. Cu mester paga pa recoge sushi, ta un hecho. E ley tin hopi tempo para eynan. Si bo kier pa SERLIMAR sobrevivi mester bay e direccion ey.”

STA ta spera cu e biaha aki e Minister concerni traha prudente pa cu SERLIMAR. Nos a ripara cu el a pasa basora, pero di otro banda a mira cu tin cara nobo a drenta. Nos ta contento cu si tin cupo di trabou, pa laga yiunan di tera haya trabou eyden. Pero mester ta hopi cauteloso pa no yega e luga cu demasiado hende pa haci e situacion financiero pio.  Pesey esnan cu ta tin bari di sushi cu ta wordo recoge door di SERLIMAR, mester bay paga pa esaki. No por duna servicio sin cu ta genera placa y e situacion financiero di e empresa lo no drecha di e forma aki.

Tambe a papia di bevordering di e empleadonan cu ta pega pa hopi tempo caba. Esaki STA kier kier mira un cambio den dje.