7 di yüni riba Alameda

Ban hasi Orashon vários artista lokal lo bai tei presente

166
Motor tras di e evento ku ta tuma lugá dia 7 di yüni riba “Alameda”.

WILLEMSTAD ,—-Mirando e situashon ku Nos pais Kòrsou ta pasando aden último tempu e produktor Widney Martha a lansa un produkshon musikal yamá “Ban hasi Orashon”. Vários artista konosí na Kòrsou a kanta riba e produkshon aki.

Entre otro;  Orlando “Piwi” Smith, Charlotte Van Blarcum, Laura Martha, Farley Lourens, Merietza Haakmaat, Ana Iria Nivellac, Richard Engelhardt i Widney Martha mes komo músiko i areglista. “Meta di e kansion ta pa hasi nos pueblo bira mas konsiente ku nos mester lanta i biba nos fe. Nos no por keda ku mesun mentalidat si nos ke bai dilanti. Kisas hopi di nos a bira nos lomba pa Dios keriendo ku nos mes por.

Pero tin hopi korientenan spiritual ku ta pasa dor di otro ku nos no por bringa ku nos armanan natural. Nos mester bai na rudia i hasi orashon pa nos por kombatí òf frena e forsanan ku ta stroba nos di bai dilanti, Widney a bisa. “Alabes nos mester pone nos diferensianan un banda i stòp di wak solamente pa nos mes p’asina nos por yuda otro. Uní nos por logra, e produktor a sigui bisa. Mi ta spera ku e kansion aki por bendishoná i aktivá e pueblo di Kòrsou i pa nos por mara huntu pa progresá i bai dilanti. Alabes nos di “Life Changers Foundation” kier a invitá komunidat kompletu pa dia 7 di yüni nos por bini huntu na Wilhelminaplein “Alameda” pa asina nos por resa i kanta huntu pa Kòrsou. E anochi aki tin diferente mandatario ku lo hiba palabra i diferente pastor di diferente dominashon ku tambe lo duna un palabra i hasi orashon pa Kòrsou. Laga nos para huntu pa nos ekonomia, situashon sosial, enseñansa i bienestar general  por drecha”.

Tambe riba e anochi di 7 di yüni artistanan tambe lo uni pa interpretá e kansion; Ban Hasi Orashon. Alabes lo honra Sr. Julius Koko tambe pa e trabou ku el a hasi último tempu. Esaki ta un invitashon pa tur hende.