Fondo di Penshun APC ta logra rendimentu kombiná di 10%

2502
E tabèl aki ta duna un bista di e invershonnan total di e fondo Kapital invertí pa 31 di desèmber 2017 indiká den mion
Pos Kabaai– Gerensha di Fondo di Penshun General na Kòrsou (APC) por ta satisfecho ku nan prestashon durante 2017 pa lokual ta trata nan bolsa di invershon. Segun APC, 2017 tabata un aña di  hopi moveshon. Merkadonan Merikano tabatin un bon aña durante 2017 i e merkadonan internashonal a move hasta mihó, debí na e echo ku mayoria pais a pasa mundialmente den un rekuperashon ekonómiko ku masha poko inflashon.

E volatilidat di e merkadonan tabata henter aña abou.E ekonomia Merikano ku a inisiá lento, a mehorá segun aña tabata desaroyá. E produkto nashonal bruto a oumenta formalmente i e sifranan di desempleo a baha, sinembargo inflashon a keda bou di e norma. E merkado di akshon a alkansá algun punto históriko durante 2017 komo konsekuensia di e ganashinan fuerte di kompanianan i un resurgimentu di e kresementu ekonómiko interno (i mundial). A base di e señalnan positivo aki Federal Reserve (FED) a inisiá ku draimentu bèk di su programa di stimulashon i a oumentá e interes na 3 okashon ku 0.25% durante 2017.

 

Na final di aña 2017 porfin a aprobá e tan sperá reformashon di belasten na Merka. Ta sperando ku e reformashon aki lo tin influensia riba entradanan di tantu konsumido komo kompanianan, pues tambe riba e kotisashon di akshonnan. E indisé konosí di kotisashon di akshonnan Merikano Standard & Poor’s 500 durante 2017 a registrá un resultado di 21.13%.

Na Oropa e volatilidat tambe a keda moderá riba e merkadonan finansiero, komo konsekuensia di e sifranan makro-ekonómiko faborabel i e notisianan polítiko positivo, entre otro e resultado di e elekshon presidensial na Fransia.Banko Sentral Oropeo (ECB) durante 2017 a keda hiba un polítika monetario sostenibel, kaminda nan a keda kumpra mensualmente 60 miar euro na fiansanan di estado i di kompanianan. ECB a duna di konosé na òktober 2017 ku nan lo bai na redusí e programa di kompra na 2018. Ku e desishon aki, final di e programa di stimulashon grandi sin presedente ku a inisiá na luna di mart 2015, ta na bista. ECB a kumpra un total di 2,165 miar euro na fiansanan di estado i bononan di kompania.

ECB a skohe pa un redukshon gradual pa evita akshonnan di pániko riba e merkadonan finansiero. Euro tambe a oumentá na balor frente dòler Merikano. E indisé Oropeo MSCI kaminda 15 pais desaoryá a partisipá a registrá un resultado di 26.24% na 2017.E merkadonan floresiente a duna e invershonistanan un bon rendimentu mirando e echo ku nan a registrá mundialmente e mihó prestashonnan. Ekonomianan Asiatiko a probechá un poko di e ekonomia Chines ku a floresé. Esaki a kondusí na balorisashon di akshonnan atraktivo den region.  E valutanan den e region Asiatiko a presta eksepshonalmente bon di moda ku e indisé MSCI Emerging Market a registrá un resultado di 37.28% ( despues di korekshon di dòler Merikano) na 2017.  

Lokal

Durante aña 2017 APC a kontinuá ku su maneho di atkisishon aktivo riba e merkado lokal di invershon kaminda fondonan a keda invertí den forma rendabel. APC a kumpra plantashi Jeremi na luna di novèmber 2017 den su portafolio di bienes raices pa kontinuá ku su desaroyo.

 

Rendimentu APC

 

APC ta invertí pa medio di su portafolio internashonal riba diferente merkado i region, finalmente pa repartí asina e riesgonan mihó posibel.  E rendimentu riba e portafolio internashonal di e fondo a resultá durante 2017 na aproksimadamente 21%, miéntras ku e rendimentu riba e portafolio lokal tabata aproksimadamente 4.5% durante 2017.  E rendimentu total di Algemeen Pensioenfonds van Curaçao a resultá na fin di aña 2017 na aproksimadamente 9.8%.