A posponé e kaso...

Ministerio Públiko a presentá sin rapòrt ADC

220
WILLEMSTAD,– Un kaso ku sigur a hala atenshon ta unda e hòmber Edsel Maria di 58 aña a presentá despues ku ta sospech’é di poseshon di droga.

E sospechoso kende ta será a presentá ku su abogado mr. Lodowica, unda el a ninga di sa di e droga. Ta trata aki di un kaso unda ta sospechá e hòmber ku e tabata den poseshon di 367 gram di kokaina, unda e mester a intentá na trafiká esaki via di C-Post aki na Kòrsou.

Esaki despues ku duana a bai hasi kontròl riba algun pakete ku mester a sali for di nos pais. Na e okashon aki a konfiská algun bleki di saldinchi, ku tabata den un situashon poko straño. Tabata despues ku a bòltu e bleki a bin nota ku esaki por tabata kontené droga.

Mas aleu durante kontròl por a mira ku e bleki a keda borá abou unda mester a hinka kokaina den dje. Tabata despues ku a hinka droga den e bleki, ku mester a plak, ku intenshon pa esaki no keda riparabel.

Tabata ayera ora mester a inisiá ku e partinan di e ‘dossier’ ku a bin nota ku no tabatin e rapòrt di ADC. Segun wes ku si no tin rapòrt di ADC, no por proba ku ta trata aki di kuantu droga ta papia en realidat i ku esaki en bèrdat ta trata di kokaina manera ta sospechá. Fiskal mr. de Groot a pidi pa posponé e kaso pa asina e logra haña e rapòrt pa trata esaki.

Tabata na e momentu ku e kier a posponé kaso pa sèptèmber próksimo, ku abogado di e sospechoso a bisa ku no por posponé e kaso largu pa fout di Ministerio Públiko, unda a pidi pa hasi esaki mas serka posibel. A posponé e kaso pa 28 di mei próksimo, unda lo mester trata esaki den kontenido.