“Ta ken di”

Piesa nobo pa kantante di XD Angelo Libinia

183
For di ayera su piesa nobo a kuminsá zona na diferente radio emisora.

WILLEMSTAD,—-Un tras di otro kantante nan di ámbito di Come-back, ta pone nan piesa nobo riba merkado. Ayera a toka turno pa e kantante di agrupashon musikal Classic XD Angelo Libinia pone su piesa nobo riba merkado.

Titulo di Angelo su piesa ta “Ta ken di”, ta trata aki di un komposishon i areglo di Ramsey Silee ku ta forma parti di agrupashon musikal Sabor “S.O.” Original. Aki bo ta mira klaramente ku tin union entre e músikonan den ámbito di Come-back.

Esaki no ta promé biaha ku Ramsey ta komponé i areglá un piesa pa Angelo. Den pasado na diferente okashon Ramsey a komponé diferente piesa pa Angelo. E duo en kuestion konosé otro bon. Esaki mes ta pone ku kada bes ku Ramsey traha un piesa pa Angelo, garantisá esaki ta bira un hit.

For di ayera e piesa nobo di Angelo Libinia a kuminsá zona na diferente radio emisora lokal. Aparte ku Classic XD tin algun piesa nobo ku ta zona bon na radio i ku ta yena pista di baile tambe, na kada fiesta ku e agrupashon musikal presentá. Pero nos tin ku bisa ku tantu Super “S.P.” Perfekta, Sabor “S.O.” Original i Zudup Hopi Forsa tambe tin algun piesa nobo ku ta zonando hopi bon na diferente radio emisora. Esaki ta loke ku ta hasi e ámbito di Come-back hopi interesante na e momentu aki. Pero loke ku ta notisia na e momentu aki ta e echo ku for di ayera Angelo Libinia su piesa nobo “Ta ken di” ta riba merkado.