Ekipo di relevo hulandes formá pa 4 YDK ku rèkòrt nobo

471
Kuarteto YDK ku a forma e ekipo di relevo hulandes.
INGLATERA—“Nos ta den gran forma i a train bon. Nos tur 4 ta di Kòrsou i ta komprondé otro fásil i ta hasi ku tur kos ta sali bon”, tabata palabranan di atleta yu di Kòrsou Churandy Martina.

Esaki despues ku e ekipo di relevo di Hulanda, a logra pa pone un rèkòrt hulandes nobo. Un ke otro durante di e fin di siman tras di lomba, na momentu ku nan a kore den kompetensia di 4 x 100 meter, den e kompetensia di Diamond League, na Londen Inglatera.

E ekipo aki, tabata formá pa e atletanan YDK, Chris Garia, Churandy Martina, Hensley Paulina i tambe Taymir Burnet. Nan a marka tempu di 38.21 sekònde, ku a bira e rèkòrt hulandes nobo.

E rèkòrt anterior tabata for di aña 2012, unda ku e propio Churandy Martina, huntu ku tambe Brian Mariano, Giovanni Codrington i Patrick van Luijk, a marka tempu di 38.29 sekònde. Tabata durante di weganan Olímpiko, unda nan a kore riba pista di e mesun stadion.

Ku e rekòrt nobo, e ekipo di relevo hulandes, a tèrminá na di 3 puesto, den e kompetensia, tras di Gran Bretaña (37.61) i Hapon (38.09).

Ku e tempu aki, chèns ta grandi ku e ekipo di relevo di Hulanda, lo por logra pa optené un medaya otro luna, den kampionato Oropeo, na Berlin.

Churandy Martina

Banda di a kore ku e ekipo di relevo, tambe Churandy Martina a kompetí individual riba distansia di 200 meter, den e kompetensia aki. Martina a krusa liña final komo e di 6 koredó den su kareda, ku tempu di 20.32 sekònde.