Sòftbòl ta logra promé viktoria den CAC na Colombia

286
E selekshon lokal.
COLOMBIA—Despues di a sufri 3 derota, e ekipo di sòftbòl femenino di Kòrsou a logra nan promé triunfo ayera. Tabata na momentu ku nan a derotá e ekipo di kas, den kampionato CAC 2018, ku ta tumando lugá na Baranquilla, Colombia.

Djabièrnè Kòrsou a kai vensí 4-1 na man di Repúblika Dominikana. Djasabra den gran partido, nos muchanan ta pèrdè 3-2 kontra Mexico. Ayera den nan promé wega, nan ta kai vensí pa blankeo, den wega ku a hunga 6 entrada, 7-0. Nos segunda base, Xiarysse Emerencianan a konektá e úniko hit di Kòrsou, unda nos picheo a risibí 10. Lee-Ann Craanberg, kende a habri i tira 4 entrada a pèrdè.

Finalmente tabata den nan segundo wega di ayera, ku Kòrsou ta gana di Colombia 12-4, ku un atake di 10 hit. Shanysse Emerenciana i Lishanty Guillermo a bati di 3-2 kada unu. Richelle Van Gennip a resultá e picher ganadó, despues di a relevá Shanna Te Vrede ku a habri i tira 2 entrada.

Ayera promé ku nos dos weganan, no por a haña nos unifòrmnan for di labanderia, loke a pone ku mester a pidi pèrmit pa por a uza otro unifòrm. Apesar di e kontratempu, nos hóbennan no a desanimá i a duna tur ku tin di nan parti.

 

Kòrsou su próksimo wega, lo ta awe, na momentu ku nos enfrenta Puerto Rico.