Kòrsou di 2 ku mas medaya tras di Sürnam

260
Akshon den e kampionato di karate di Karibe.
WILLEMSTAD—Durante di e fin di siman ku ta tras di lomba, a tuma lugá e kampionato di Karibe di Karate, ku a konta ku partisipashon di atletanan for di entre otro Aruba, Boneiru, Santo Domingo, Cayman Islands, Trinidad Sürnam i Kòrsou.

Diferente pais pa motibu finansiero no por a partisipá, miéntras tin diferente atleta ku a bai Barranquilla pa partisipá na weganan Sentroamerikano i di Karibe, ku ta tumando lugá aktualmente.

No opstante esaki tòg por mira atras riba un kampionato di Karibe di nivel i ku paisnan tabata hopi kontentu pa ku e organisashon i e nivel di karate i tambe arbitrahe.

Minister Zita Leito, riba e fecha di apertura, a hiba diskurso na nòmber di gobièrnu i alabes a deklará e kampionato ofisialmente habrí.

Pa Kòrsou Denise Leito, Edlenmar Becker, Denzel Leito, Jolano Lindelauf i e ekiponan senior i junior a gana medaya di Oro.

Ku esaki Kòrsou a sali na di 2 lugá riba tabla di medaya despues di Sürnam.

Di parti di direktiva di Curaçao Karate Bond, ta bai palabranan di gradisimentu na CTB, ACU, MCB, CUROIL,HBM Group i BTP pa nan kontribushon, pa asina e evento aki, por a bira posibel, kual sigur Junior Millerson, kende ta e presidente di e federashon, ta kontentu p’e.