A klousurá sirko pa akto ku a faya i laga 9 herido

390
Momentu ku tabata saka esnan heridá den e insidente lamentabel aki.

LIMA – Na Lima, Perú, outoridatnan a haña nan ta klousurá e sirko ‘de Italia’, den kua den un funshon un aksidente basta grave a keda registrá. Esaki tabata durante un presentashon di e asina yamá ‘globo de la muerte’ ku a sali malu.

Un total di nuebe koredó di bròmer a aksidentá ku otro. Algun di esaki nan inkluso ainda ta interná den e sentro médiko pa kua nan a keda transportá despues di e insidente.

E insidente lamentabel aki a keda grabá i e imágennan aki a keda publiká i mirá pa míles di personanan riba diferente retnan sosial. Riba e grabashon aki por mira kon mal maniobra di un di e motosiklistanan ta okashoná ku tur nuebe ta aksidentá. Bou di gritunan di esnan presente ta mira miembronan di e sirko kore di un forma desesperá pa yuda nan kompañeronan.

Loke a hala hopi atenshon ta ku no sa kiko presisamente por a bai robes. Sigur tumando na kuenta ku esnan ku ta realisá e akto aki, esun mas sperá i esun ku ta sera anochi kuné, asta tin un rèkòrt Guinness riba nan nòmber, pa realisá e mesun akto aki ku asta 11 bròmer pareu.

Despues ku outoridatnan di e pais a klousurá e sirko, kuater motosiklista a drenta i disidí di realisá e show tòg. Esaki pa asina mustra ku nan por i ke sigui ku nan presentashonnan, kua tabata planiá pa te ku dia 12 di ougùstùs próksimo.

Sinku di esaki nan mester a keda trasladá pa un sentro médiko despues di e insidente, di kua dos ainda ta interná den un sentro médiko. Entre e dos nan aki tin un hende muhé, kende esun ku a hiba e pió sla, na altura di su kabes.

Segun e kabesante di e sirko, esaki tin tur pèrmit na òrdu i no tin un regla di un límite di kuantu hende por realisá e akto aki. Ademas nan a risibí un but di pone personanan na peliger i outoridatnan awor lo bai investigá si nan ta sigui tur regla pa ku seguridat.