Liña fuerte tira riba Nichel Richards

118
No tin duda ku ta trata aki di un tremendo pianista.

WILLEMSTAD,—-Ketu bai tin mas moveshon nan ta sigui tuma lugá den farándula. T’asina ku djaluna tras di lomba ‘E Mulina’, a haña informashon ku tin liña fuerte tira riba e talentoso hóben pianista Nichel Richards ku ta forma parti di agrupashon musikal Y.M.G.

Di informashon ku a drenta serka di ‘E Mulina’, ta bisa ku djaluna tras di lomba Nichel a keda señalá den e diskotèk Chocolate Night Club Curaçao, kaminda ku na e momentu ei tabatin ensayo di un agrupashon musikal nobo.

Mester bisa ku presensia di e pianista a hala bastante atenshon, mirando ku den e banda tin e kantante eks miembro di agrupashon musikal Y.M.G. ku ta Michelangelo Martina. Esaki a pone mes ora ku e informashon a yega serka ‘E Mulina’, ku e chèns ta hopi grandi ku por bin otro moveshon den farándula.

‘E Mulina’, a bai hasi algun investigashon rondó di Nichel pa loke ta trata su partisipashon den agrupashon musikal Y.M.G. i nos a komprendé ku Nichel na e momentu aki ta direktor musikal di Y.M.G. i ku e no tin ningun plan pa bandoná e banda, pero di otro banda tambe nos tin informashon ku Nichel su nòmber ta ser menshoná den e posibel pianista do e agrupashon musikal nobo. Tempu lo ta e mihó maestro den e kaso aki. Paso tin basta pida, pida kos papia den kaya na e momentu aki.