Minister di finansa ta desmentí ku nos florin ta den peliger

E ta keda insistí ku tampoko no tin motibu pa tuma niun medida:

1456
WILLEMSTAD—N’e momentunan aki e situashon ekonómiko di Kòrsou no ta di kanta makamba. Kontinuamente bo ta tende di kompanianan ku a dal nan porta sera poniendo ku tin hopi mas tantu hende riba kaya sin trabou.

Hasta ta ser papia ku si Refineria Isla dal sera ku esaki lo tin un impakto ekonómiko hopi grandi riba nos isla. Te ainda no ta konosí ku Gobièrnu di Kòrsou ta kedando kla ku un operador, siendo kontrakt ku PDVSA ta vense 31 di desèmber di 2019. Den entrevistanan anterior hasi ku Minister di Finansa Sr Kenneth Gijsbertha el a mustra Kòrsou pa e keda trankil, paso nan no tin intenshon di tuma niun medida. Awor ta surgiendo informashonnan ku si no hasi algu ku ekonomia di Kòrsou lo kolèps pa final di aña. Esaki a trese kuné hasta spekulashon ku nos florin por ta den peliger.

Nos a kombersá ku Minister di Finansa Sr Kenneth Gijsbertha i el a mustra nos ku lokual ku ta ser plama ei no tin nada di bèrdat aden. El a konfirmá na Vigilante ku nos florin no ta den peliger. Sr Kenneth Gijsbertha a pone asento riba e echo ku komo gobièrnu nan no tin problema pa kumpli ku nan obligashon. Aserka el a mustra Vigilante ku pa florin ta den peliger, nan mester bai den e reserva na Banko Sentral kua tampoko lo no sosodé. Nos florin no ta den peliger

. Mi ta refutá esaki kategorikamente, tabata e palabranan di Sr Kenneth Gijsbertha. Mas aleu el a mustra riba e echo ku pa lokual ta trata e asuntu ku kada biaha ta keda trese dilanti ku nan mester tuma medida ku esaki tampoko no mester ta e kaso. E ta konvensí ku si kobra e plakanan ku tin riba kaya ku no tin niun motibu pa tuma medida.  P’e ta asina ku tin hopi plaka riba kaya i ku ta esaki nan mester kobra, pa asina gobièrnu tin sufisiente sèn den kaha. Sr Kenneth Gijsbertha ta hopi positivo pa lokual ta trata e proyekshonnan ku nan a hasi pa lokual ta trata 2018. Su punto di lansa a keda ku gobièrnu tin sufisiente plak riba kaya.

Ku esaki e ta keda para ariba ku si logra haña e miónes di florinnan ku tin riba kaya ku tur kos lo sigui kana bon pa loke ta finansa dui Kòrsou.  Por realisá ku enbèrdat Ontvanger ta hopi skerpi últimamente mandando aanslag i deurwaardernan riba esnan ku tin debenan habri na impuesto.