Aqualectra tin konstrukshonnan di 4000 kas na Wechi wantá

FKP ta wardando riba nan pa pone instalashonnan:

4233
WILLEMSTAD—Tin sierto kosnan ku ta pasando na Kòrsou ku bo no ta kaba di komprondé. Tur e instansianan ta kai bou di gobièrnu, pero ta parse ku nan tin nan propio agènda, siendo ku djis poko kolaborashon hinter e asuntu ta aklará.
Wechi: FKP ta kla pa sigui ku e proseso pa konstruí e 4000 kas nan, pero ta wardando riba Aqualectra.

Redakshon di Vigilante ta siguiendo e desaroyonan rònt di Wechi hopi di aserka. Manera ta konosí ta trata akinan di un proyekto ku tin un invershon di 500 mion florin pa konstrukshon di 4000 kas. Di parti di FKP nan a kuminsá ku e promé konstrukshonnan, pero mester a wanta dado momentu pa atendé entre otro e kaso kontra Amigu di Tera.  Pa lokual ta trata e kaso aki ta asina ku resientemente FKP a gana e kaso ku nan tabatin kontra Amigunan di Tera. Ta asina ku den seno di FKP nan ta di opinion ku Amigu di Tera kier stroba e desaroyo nan na Wechi saliendo na fabor di poko habitante na Juliana Dorp.

Arthur Con: Si Aqualectra perkurá pa por tin iluminashon awe mañan mes FKP ta kla pa sigui ku konstrukshon dje kasnan.

Ta asina ku den seno di FKP, nan ta lamentá e echo ku  Amigu di Tera ta defendé interes di algun habitante di Julianadorp ku ta kontra desaroyo di Wechi. Ta asina ku pa lokual ta trata Proyekto Harmonie ku a limpia tereno te yega Bullenbaai nan no a interesá mes pa sa si tin bouwvergunning, segun nos a keda informá. Pa esnan na FKP ta asina ku Amigu di Tera ke stroba – 4000 famia di haña kas, aparte dje echo ku Wechi ta krea kuponan di trabou i desaroyo di ekonomia. E problema di mas grandi pa lokual ta trata konstrukshonnan dje kasnan no ta sinta serka Amigu di Tera, paso ya esaki ta tras di lomba. E problema mayor ta sinta na Aqualectra. Ta asina ku nos a keda informá dje echo ku di parti FKP nan ta kla pa sigui ku konstrukshon dje kasnan. E motibu ku nan no por sigui ku e konstrukshonnan ta debí na e echo ku nan no ta kla pa usa materialnan ku despues por ser hòrtá ku fasilidat.

Derrick Jonis: FKP a hasi apelashon pa suministro di koriente pa asina pone lus na Wechi, pero ainda no a tende di nan.

Pa FKP por kuminsá ku kontinuashon mesora dje kasnan, nan mester di koperashon di Aqualectra. Ta algu ku ya nan a yega di pidi Aqualectra. Lokual ku nan a pidí Aqualectra ta pa nan pone konekshon di koriente na Wechi. Motibu ku nan a hasi e petishon aki ta sinta den e echo ku nan ta teme ku dor ku na Wechi ta asina suku, ku anti sosiainan lo por bin hòrtá loke ku ya nan a kaba di pone na e kasnan. No solamente esei, sino hòrtá e materialnan di konstrukshon. Te dia di awe FKP no a tende di Aqualectra ki dia ta honra nan djis ku e instalashonnan di koriente ku nan a pidi. Pa nan no ta bai mes pa iluminá hinter Wechi. Tur lokual ku nan mester ta suministro di koriente na Wechi. Redakshon di Vigilante a keda garantisá dje echo ku manera Aqualectra pone koriente ku FKP lo sigui ku konstrukshon dje 4000 kas nan. Redakshon di Vigilante a trata na drenta den kontakto ku Sr Derrick Jonis, pero lamentablemente no por a haña e direktor interino di Aqualectra na liña.