Hòmber ku a bai hiba droga prizòn i su amigu ku tabata ward’é arestá

4457
Willemstad— Ayera un hòmber ku a bai hasi bishita na Prizòn a keda arestá pa poseshon di droga i tambe esun ku tabata para ward’é den outo tambe a keda detené.

Tabata den oranan di atardi ku e personal di Prizòn  a pidi asistensia di Polis pa un bishitante ku nan a kaba di arestá. A detené e bishitante debí ku e la trata di hinka droga den e instituto. Polis ku a bai pa tuma e sospechoso serka e personal di prizòn a haña  e informashon ku pafó di e instituto lo mester tin un outo ta warda e sospechoso ku un hòmber sinta den dje. E tipo den e vehíkulo ku a tuma nota di presensia di Polis a start e vehíkulo  i a trata di kore bai pero a keda blòkia pa Polis na altura di Landfill na Koraal Specht. Einan e tambe a keda arestá komo kómplise na unda a konfiská su vehíkulo bai warda kuné pa mas investigashon.