Diferente moveshon i rumor di futbòl internashonal

147
Diferente moveshon i rumor di futbòl internashonal
INTERNASHONAL – Aki ta sigui e notisianan mas relevante di posibel transakshonnan i transferensianan ku a keda realisá den futbòl internashonal.
Gareth Bale ku tabata anotadó di e di dos gol pa Real Madrid.

Pa loke ta e último weganan di fogeo na Spaña                                                               Real Madrid ta gana di AC Milan i Atlétiko Madrid ta kai kontra Internazionale

MADRID – Den loke tabata e último wega di fogeo promé ku nan temporada regular ranka sali, e tòp ekiponan di Madrid i Milaan a enfrentá otro na Madrid  preparando asina pa nan próksimo  kompromisonan. Tabata e ekipo di Real Madrid ku ta gana ku skor di 3-1 di e ekipo AC Milan. Den otro enkuentro amistoso komo parti di nan preparashon, tabata e ekipo di Atlético Madrid ku a enfrentá e ekipo di Italiano Internazionale i ta kai vensí ku skor mínimo di  0-1. E enkuentro entre e ekipo di Real Madrid i AC Milan a tuma lugá den stadion Santiago Bernabéu i tabata bálido pa e trofeo Santiago Bernabéu. Benzema, Bale i Mayoral tabata esnan ku a skor pa Real Madrid miéntras ku Gonzalo Higauin a skor su promé gol pa AC Milan. Pa loke ta e enkuentro entre e ekipo di Atlético Madrid i e ekipo di Internazionale, esaki a tuma lugá den e stadion Wanda Metropolitano na Madrid i tabata Lautaro Martínez ku ta skor e úniko gol di e enkuentro.

Lautaro Martínez ku a skor e úniko gol di e enkuentro pa Internazionale.

Durante e di 47 edishon                                                                                                       Valencia ta gana e Trofeo Naranja pa di 28 okashon

VALENCIA – Tabata djasabra anochi ku e ekipo di Valencia, durante di e di 47 edishon di e Trofeo Naranja, ta gana esaki pa di 28 okashon, bálido pa e último wega di preparashon. E ekipo dirigí pa e entrenado Marcelino García Toral, den un stadion Mestalla kompletamente yená ku fanátiko (40.000) ta logra un viktoria ku skor di 3-0 kontra di e ekipo aleman Bayer Leverkusen. Santi Mina, Rodrigo i e debutante di diesshete aña Kangin Lee tabata esunnan ku a skor pa Valencia.

Valencia ta gana e Trofeo Naranja pa di 28 okashon.

Un desishon ku e futbolista lo a tuma basta tempu kaba                                             Gerard Piqué ta retirá for di selekshon nashonal

SPAÑA – Gerard Piqué lo no bolbe mira akshon pa e selekshon di Spaña mas. E defensor di 31 aña di Catalonia resientemente a anunsiá su desishon na e entrenadó nobo Luis Enrique ku e lo stòp komo hungadó di e selekshon nashonal. “Mi a papia ku Luis Enrique i mi a splik’é ku ta pa basta tempu kaba mi a tuma mi desishon”, asina Piqué a komentá na prensa. “Mi a pasa un periodo hopi dushi ku e selekshon, unda ku mi tabatin e oportunidat di konkista un título oropeo i mas ku tur kos un título mundial. Awor mi ke pone tur atenshon pa e ekipo di Barcelona”, segun Piqué a splika

Gerard Piqué ta retirá for di selekshon nashonal.

Premier League                                                                                                         Liverpool ta start temporada ku goliada riba West Ham United

LIVERPOOL – E ekipo di Liverpool a start nan temporada bálido pa e Premier League ku un tremendo goliada 4-0 riba e ekipo di West Ham United. Tabtu Virgil van Dijk i Georginio Wijnaldum a hunga e wega kompletu pa e ekipo di The Reds, ku e temporada aki ta bai pa e título di liga pa promé bia for di 1990. Tabata un sla formal pa West Ham United ku a invertí basta sèn den algun hungadó nobo. Mohamed Salah a habri e skor pa Liverpool miéntras ku Sadio Moreno a amplia e skor i a anota e di tres gol i Daniel Sturridge a kaba di seya e viktoria.

Mohamed Salah a habri e skor pa Liverpool.

Ganando e ‘Supercup’ na Alemania                                                                                      Bayern München ta pasa fásil riba Eintracht Frankfurt

FRANKFURT – Bayern München a kai vensí tres luna pasá kontra di e ekipo Eintracht Frankfurt ku skor di 1-3, den un wega ku a tuma lugá den e Olympiastadion na Berlin. Pero ayera nochi den e Commerzbank Arena na Frankfurt, e ekipo kampion aleman tabata demasiado fuerte pa e kampion di kopa, den e wèg bálido pa e super kopa aleman, ganando ku skor di 0-5. Robert Lewandowski tabatin un ‘hattrick’, anotando na di 21, 26 i 54 minüt di e enkuentro. Kingsley Coman i Thiago Alcântara tambe a skor na di 63 i 85 minüt p hasi e skor 0-5.

Robert Lewandowski tabatin un ‘hattrick’ pa Bayern München.

Ganando ku skor di 0-2                                                                                                Manchester City muchu mas fuerte ku Arsenal na apertura di temporada

Manchester City a start e temporada nobo di Premier League ku un viktoria di 0-2 komo bishitante serka e ekipo di Arsenal. Raheem Sterling i Bernardo Silva a skor pa e ekipo di Pep Guardiola. Manchester City siman pasa djadumingu a gana ku skor di 2-0 tambe di e ekipo di Chelsea na London, den e bataya pa e Community Shield, ku a tuma lugá den Wembley. Tabata e argentino Sergio ‘Kun’ Agüero ku a anotá e dos golnan na e okashon ei. Ayera tabata Raheem Sterling ku na di 14 minüt ta manda City ariba.

Bernardo Silva ta selebra despues di a skor e di dos gol pa e ekipo di Pep Guardiola.

Messi ta konkista asina su di 33 premio ku FC Barcelona                                                  Barcelona ta gana e Super Kopa di Spaña na Tangier

TANGIER – FC Barcelona pa di diestres bia den su historia ta konkista e Super Kopa di Spaña. E ekipo ganadó di LaLiga i tambe Kopa di Rei, tabata simplemente mas fuerte ku e ekipo di Sevilla ayera ganando ku skor di 2-1. E enkuentro aki a tuma lugá den e stadion ‘Stade Ibn Batouta’ ku ta situá den e siudat marokano Tangier. Despues ku e enkuentro ta yega 78 minüt empatá na unu, e franses Ousmane Dembélé ta los un tremendo disparo for di un distansia di 25 meter pa asina manda e ekipo di FC Barcelona ariba i alabes e viktoria. Pa Messi esaki tabata su di 33 premio ku e ta konkista huntu ku e ekipo di FC Barcelona.

Messi ta konkista su di 33 premio ku FC Barcelona.