Pisas ta bou di investigashon

432
Punda — E pólítiko, èks promé minister i aktual miembro di parlamento, Pic Pisas ta bou di investigashon. Fuentenan verídiko den seno di Kuerpo di Polis a señalá esaki na Vigilante.

E motibu dje investigashon no ta konosí pero ta 100% sigur ku hustisia a pone sombra riba Pic Pisas. Pa kasualidat, durante un entrevista ku Vigilante siman pasá, Pisas no a ekskluí e posibilidat ku Ministerio Publiko ta bin buské. Segun Pisas, awor ku a kondená, kasi tur prominente den e partido nan ta bini p’é. El a bisa tambe ku su konsenshi ta limpi i ku e sigur no tin niun akto robes ta hasiendo. MFK ayera anochi den un ” app”  di Gerrit Schotte, a konfirmá ku funshonarionan di RST ta opservando kas di Pisas. Den nan app MFK a bisa ku : ”

“Notisia di último ora – MFK: Polítikonan Hulandes i nan marionetnan, RST i OM ta “bezig” atrobe; awor e “target” ku falta di MFK pa eliminá fe mapa polítiko ta señor Gilmar “Pik” Pisas un homber krioyo den tur aspekto, humilde, un piskadó mas di Bándabou ku den elekshon último di aprel 2017 siendo Minister di Hustisia i Minister Presidente alabes pa MFK den 2 luna a logra aglomerá hopi atenshon i konfiansa i a surpasá 3000 mil voto pa e lista di MFK na posishon # 3. Esaki dimes no mag, MFK tin ku wòrdu destruí a kosta di tur kos pa limpia e kaminda pa polítikonan lokal di partido nan ku ta siguí ordu di Politiek Den Haag al pie de la letra, ku apesar ku nan ta gobernando sin niun hende strobá nan, nan ta zink nos pais”.
Vigilante a trata na haña bosero di OM, Norman Serphos, pero e no tabata alkansabel.