AQUALECTRA TA HASI PROYEKSHON DI PRODUKSHON I DEMANDA DI KORIENTE DEN UN SIMAN TRANSPARENTE PA KOMUNIDAT

1103
Willemstad-  Disponibilidat di koriente ta dependé pa gran parti di e kapasidat di produkshon ku por konta kuné for di kada unidat ku ta produsí koriente.  Aqualectra, den kuadro di su esfuerso pa hasi komunidat mas konsiente di e kapasidat na koriente disponibel i e demanda pròksimamente lo kuminsá publiká e loke por spera na produkshon di koriente di kada unidat, riba kada dia di siman enkuestion.

Mesora lo por tuma nota di e pik di e demanda riba kada dia tambe.  Riba Aqualectra su wèpsite, su página di Facebook avisonan den korant lo por tuma nota di e proyekshon di produkshon pa kada unidat ku ta kontribuí na e kapasidat máksimo ku Aqualectra tin na koriente kada dia plùs e demanda pik. Di e forma aki kada un di nos por husga, kon na un forma responsabel por atendé ku konsumo di koriente, teniendo kuenta ku e kapasidat di koriente disponibel.

Parti di e responsabilidat di un kompania modèrno di utilidat ta, di duna komunidat un bista kla kon ta manehá produkshon i distribushon di koriente.  Aqualectra a introdusí medionan pa kada ken mes manehá su konsumo di koriente i awa na un forma responsabel. Asina p.e. bo por tuma nota di resumen di konsumo riba bo resibu pero tambe por konsultá ku MiKuenta kaminda tin amplio informashon tokante di bo konsumo di awa i koriente. Riba e wèpsite di Aqualectra bo ta haña un bista al dia di trabounan di mantenshon.Ta den mesun lus mester mira e esfuerso pa hasi e disponibilidat di koriente tambe mas transparente.  Aqualectra na un forma simpel ta duna komunidat un bista kla di e kapasidat proyektá di produkshon di koriente dor di su plantanan na Dokweg, su planta disel riba tereno di isla i e turbina di gas na Mundu Nobo banda di e loke ta keda produsí pa e parke di mulina na Tera Kora, CRU i Aggrekonan.

Awor ku nos ta den e periodo kaminda konsumo di koriente ta oumentá debí na e klima kalor e bista aki  por ta informashon balioso pa kada un di nos tene kuenta kuné.  Banda di hasi mas tantu posibel pa usa koriente na un forma responsabel. Riba e wepsite di Aqualectra por haña tepnan importante kon hasi uso responsabel di awa i koriente.  Den kaso ku tin pregunta semper por yama e number grátis di servisio na kliente di Aqualectra na 0800 0135 (24/7.)

Atentamente,
Gerensia Aqualectra