Daven de Palm komo parti di ekipo U-17 na Almere City

182
Daven durante di e training den sala.
HULANDA—E hóben futbolista Yu di Kòrsou, Daven de Palm, ta praktikando huntu ku e ekipo U-17 di e organisashon di Almere City FC na Hulanda. Esaki durante di e siman aki, unda e ta na tera friu pa un tryout di un siman.

Daven ta miembro di e organisashon Gemstones United, di e bario di Kura Piedra i a hunga te ku resientemente den kategoria U-15 den kompetensianan na Kòrsou. Ta e intenshon pa e temporada benidero e inisiá komo parti di e kategoria U-17.

Miéntras tantu despues di a destaká resientemente na Boneiru, e la wòrdu invitá pa por ta parti di un tryout serka di e organisashon di Almere City FC. Aki a bin resultá ku e ta huntu ku algun otro futbolista mas, entre otro Ayrton Cicilia di Boneiru, kende tambe a keda invitá pa e tryout. Cicilia di 16 aña di edat, ta forma parti di trainingnan ku e ekipo U-20 di e organisashon.

Miéntras tantu Daven, banda di ta esun mas hóben, ta tambe esun di ménos estatura, unda di tur manera e ta mas chikí den e ekipo i riba tereno, durante di e trainingnan e siman aki.

E hóben futbolista di nos, ta hasiendo su máksimo esfuerso durante di su tryout, apesar ku tabata un invitashon poko riba man i inesperá.

Lokual ku si ta sigur, ku ya e la siña hopi kaba, durante di  práktikanan tantu riba tereno di wega di stadion Yanmar, komo tambe práktikanan ku a tuma lugá den un sala deportivo, ku ta den un kompleho super moderno, entre tur e futbolistanan mas grandi kuné. Sigur un tremendo eksperensia, ku lo por bira tambe su futuro.