Willemstad,– Tin dos punto ku minister Girigorie a bisa durante rueda di prensa ku e ta rekonosé den rapòrt di Amnesty International. E ta bisa ku ningun no hende no mester bisé ku e lokalidat pa sera hende na Rio Caniario no ta adekuá, paso e mes komo minister manera el a sinta a manda sera e sèlnan ei.

Minister a bisa ku djarason 2’or  e sèlnan na Rio Canario a bolbe keda será i awor a saka un besluit ku nunka mas por sera hende den e sèlnan aki.

Esaki ta debí na e sistema di riolering, paso hende no por a hasi uso di tualèt den e sèlnan aki, tambe nan mester drumi ku porta habri, pues ta un situashon ku no por a ser permití mas, Nan no ta sirbi i minister a bisa ku no ta hinka sèn mas den e sèlnan aki i ku pronto lo bai traha sèlnan nobo.

Minister a bisa ku a pidi Hulanda pa yuda ku un montante ku ainda no a yega, E plan ta pa yega na un lokalidat ku por detené hende di un forma mas humano.

Minister ta bisa ku e sistema di laga un hende keda liber na kas di hende pa e bai e dia ku e mester keda deportá, no ta funshoná i ku hinter e maneho aki a resultá ku nos tabata gañando nos mes. Pa garantisá ku e persona ta bandoná bo pais, ta detené nan, pero apart for di otro detenidonan.