E mènedjer John Gibbons lo no ta bèk den 2019

63
Tur kos ta indiká ku e mènedjer John Gibbons lo no ta bèk ku Toronto den 2019.
TORONTO – E era John Gibbons komo dirigente di e ekipo Toronto Blue Jays ta hopi serka di konkluí, asina Jon Heyman di MLB Network ta informá. Ademas Heyman a agregá ku e ekipo di Toronto i Gibbons “ta kla pa kibra nan relashon” na final di e temporada 2018.

Heyman a splika ku algun fuente lo a ekspresá na dje ku tin un probabilidat di “99.9%” ku e ekipo di Blue Jays lo bai kontratá un mènedjer nobo pa loke ta e temporada 2019. Segun Mark Feinsand di MLB.com ku ta hopi probabel ku Gibbos lo ser despedí na final di e aktual temporada. E gerente general di e ekipo di Toronto, Ross Atkins, no a duna ningun remarke òf komentario relashoná ku e informe ku Heyman a publiká.

Sin embargo, e miembro di direktiva ya lo a deklará anteriormente ku Gibbons lo finalisá su temporada promé ku e ekipo analisá e situashon di e mènedjer. Atkins a deklará dia 17 di ougùstùs ku ainda nan no a tuma un desishon relashoná ku e puesto di Gibbons, kende aktualmente su akuerdo ta kore te ku e próksimo temporada.