Rutte: kaso labamentu plaka ING hopi serio

151
Rutte ta haña e kaso di ING hopi grave
DEN HAAG—Ta un kaso hopi serio, asina premier Rutte a reakshoná riba e práktikanan di labamentu di plaka na ING.

Bankonan tin un ròl den vigiliansia i protekshon di e sistema finansiero, segun e premier. Awor a resultá ku ING a faya den e funshon importante aki pa komunidat, den evita labamentu di plaka kriminal i evita finansiamentu di terorismo. Rutte no kier duna opinion riba e desishon di Ministerio Públiko pa regla pa ING paga 775 mion euro di but serka ING. OM ta atende e parti penal, riba kua Rutte no ta duna komentario. Rutte ta envolví si den kombersashonnan ku minister Hoekstra di Finansa ta hiba riba e kuestion, manera ayera ku presidente-komisario di ING Wijers. Loke nan a palabrá i si Hoekstra a pidi retiro di gerensia di ING, ta keda sekreto segun Rutte. ING a haña e but pasobra e no a kontrolá su klientenan ku tabata laba miones via nan kuentanan. For di 2016 OM ta hasiendo investigashon riba labamentu di plaka. OM a skohe pa un areglo pasobra un kaso den korte lo dura largu posiblemente ku mesun resultado. No ta prome biaha ku Rutte tabata krítiko riba asuntunan di ING. E tabata kontra e plan pa duna e e direktor un salario di 3 mion euro, ku ta un oumento di 50%. Esaki a bai ku hopi protesta di gabinete, Tweede Kamer i komunidat. Mester konstatá ku preshon di komunidat riba e intenshon a kondusí na un kambio.