Punda—Miéntras ku Ofisina di Turismo, CTB, ta kontentu debí na un oumento den sifranan di turismo, atrakadónan tambe ta djente afó. Segun kontentu di Vigilante, mas di 20 kaso di agreshon a tuma lugá na Kòrsou, kontra di turista. Esaki den forma di robo, atrako, ladronisia of destrukshon di propiedat. Mester bisa, un veredikto di korte ku a kai na febrüari di e aña aki kontra di dos atrakadó di turista, a slow down e akshonnan agresivo kontra di turista.

Prinsipalmente e atrakonan brutal ta lagando un mancha skur atras serka nos bishitantenan. Aña no a ni kaba di habri ku riba 5 di yanüari, turistanan riba San Pedro a wòrdu desagradablemente sorpresa pa atrakadónan ku a bai ku kasi tur kos id nan. Ta trata di turistanan kende a skohe Kòrsou spesífikamente pa nan pasa nan aña akinan. 14 di yanüari dje aña aki, algun kriminal a drenta den un apartamento i atraká un hòmber turista den un apartamento na Berg Altena. Anke ku Politur e tempu ei a bai bishita e víktima no tabata por a hasi nada mas. E atrakonan a sigui na yanüari. Riba 16 di yanüari den Punda un grupo di turista ta wòrdu di shòk den Punda, despues ku un suheto ta ranka nan tasnan kore bai kuné. Apénas 2 dia despues, na Playa Kanoa, otro atrako riba turista.

Asina 2018, a sigui ku seri di atrako, robo i prinsipalmente ladronisia den vehíkulonan di hür. Na Baya Beach por ehèmpel, ta kasi tur siman tin turista ta bira víktima di ladronisia. Mester bisa ku un kastigu pisá riba atrakadónan di turista na febrüari dje aña, remarkablemente a para e agreshon pa ratu kontra di turistanan. Pero no a dura muchu largu. Asina por ehèmpel, 8 siman despues di e veredikto den korte, riba 8 dia aprel ta bolbe atraká turista riba Waaigat. Asina a sigui i durante mitar di 2018, Kòrsou tabata un mal anfitrion pa nos turismo. Tin un kantidat di por lo ménos 6 mil famia ta dependé dirèkt di turismo. 95% dje kasonan di atrako òf agreshon kontra di turismo no ta wòrdu solushoná i 100% no ta haña atenshon di gobernantenan.