Kosta Sùit—Tin hopi mas persona indokumentá ta drenta Kòrsou ku Warda Kosta por interseptá. Apesar di ta trahando duru na kostanan di Kòrsou, tòg botonan venezolano ta logra trese pasahero fo’i Venezuela pa nos kostanan.

Manera ta konosí, siman pasá a bin deskubrí un boto di Las Piedras pegá den kosta Sùit di Kòrsou. Momento Warda Kosta a yega tabata lat kaba, pero a logra arestá dos persona sin dokumento i manda esakinan bek Venezuela. E dianan aki Warda Kosta den akshonnan preventivo ta kontrolando kostanan di Kòrsou tantu na tera komo via laman. Mester bisa ku den mondinan di kosta Sùit, ta hañando masha hopi tas ku paña òf paña bentá kant’i kamindanan di tera. E pañanan ta wòrdu lagá a atras sea pasobra e doño no a logra yega kantu na bida òf debí na peso den oranan di mardugá, ta opta pa laga algun paña atras. Mayoria dje ophetonan i paña ta prosedente di hende muhé.