Willemstad,– Minister Steven Martina a bisa ku ta papiando ku OLG i e kombersashon nan ta den e proseso final i ku tin dos proposishon riba mesa. El a splika ku e di dos proposishon sierto detayenan ku mester kaba di kontesta basa riba kual por drenta den rekta final pa un eskoho final.

Minister ta bisa ku OLG su proposishon ta riba mesa. “Desishon di korte no ta floha e negoshashon nan mirando ku hues a pone sierto kondishonnan pa regresá serka dje pa mustra e progreso i ku ta trahando”, minister Martina a bisa. E ta bisa ku e kompania Insel Air ta keda unu vulnerabel i no por traha mas debe, pues mas lihé bo yega na konklushon ta mas mihó pa tur hende. E titular di ekonomia ta bisa ku ta tene kuenta ku ta un proseso kompliká i p’esei tambe hues a duna mas tempu.

Dado kaso no yega na akuerdo ku OLG lo start un proseso nobo ku esnan interesá, pues tin plan A ku B i si nan faya tin tambe plan C i D. E interes di OLG ketu bai ta grandi i ta spera di yega na akuerdo pa garantisá kontinuidat di e kompania Insel Air.