Gregory “Chayenne”Gonzalez rumbo pa Orkesta Risab

177
Tur kos ta mustra ku e ta bai forma parti di “Risab”.
WILLEMSTAD,—-Ayera durante dia ‘E Mulina’, a haña informashon ku Gregory “Chayenne”Gonzalez ta rumbo pa agrupashon musikal Risab komo kantante. Manera ku e informashon aki a bira konosí serka ‘E Mulina’, mes ora nos a subi kaya pa asina investigá kiko tin di bèrdat rondó di e informashon ku a yega serka nos.

T’asina ku bèrdat ayera “Chayenne” a keda aserka pa asina pasa forma parti di e agrupashon musikal den ámbito di Come-back Risab, ku algun siman tras di lomba tabatin algun presentashon ku a dal hopi duru, i ku mes ora diferente fanátiko di e banda pero tambe amante nan di Come-back a pidi pa e banda keda aktivo den nos farándula.

Esaki a pone ku gerente di e banda i tambe músiko nan di Risab a bai pensa i práktikamente tur ta di akuerdo ku e banda mester tei pa keda den nos farándula. Mes ora moveshon nan a kuminsá pa asina pone tur kos na òrdu pa e banda por sigui ku nan presentashon nan.

Ayera algun músiko di Risab tabata huntu i ta aki nan nòmber di Gregory “Chayenne”Gonzalez a bin dilanti. For di nos fuente nos a haña informashon ku e kantante “Chayenne” a aseptá e reto sin a pensa dos biaha, tambe nos tin informashon ku “Chayenne” tambe tabata den e reunion di ayera mainta, ‘E Mulina’, a drenta den kontakto ku “Chayenne” i nos a bisé di e informashon ku nos tin rondó di su persona, wèl, wèl, wèl “Chayenne” a keda hari sin duna nos un kontesta, esaki ta nifiká ku kaminda ku tin huma tabatin kandela.