Lagando esun ku lo mester a asesiná su amigu paralisá...

Hóben a kue arma di kandela di hòmber asesiná i kaba kashi bala

522
Investigá: un reshèrshi tékniko ta investigando 25 di yanüari último. Hopi bala a wòrdu tirá e anochi en kestion.
WILLEMSTAD,– Un kaso ku a hala hopi atenshon ayera ta esun unda Frangelon Laker di 20 aña a presentá, despues ku ta sospech’é di kometé echo kastigabel grave. Ta trata aki di e kaso unda mester a kita bida di e víktima Jeangianno Zimmerman dilanti Spoonz, despues ku e tabatin problema entre 2 grupito.

 

Tabata despues ku Zimmerman a keda tirá e ku e hòmber Laker lo mester a pasa bai kue su arma i djaleu a los tiru riba e hòmber Statie, lagando e hòmber aki paralisá. Statie ta keda sospechá di a kita bida di Zimmerman kende ta amigu di Laker i tambe Celio Balentina, kende ta sospechoso den e kaso. Laker no a papia mashá ayera den korte, unda el a ninga di a tira  Statie, unda el a splika ku en bèrdat el a kòrta su kabei pero no mesun dia manera a indiká. Mama di e sospechoso Laker lo mester a deklará ku su yu a kont’e, ku el a bai sali ku 2 amigu, unda aki nan mester a topa algun tipo ku nan tabatin problema kuné. E mama a sigui bisa ku su yu a bisé ku e la wak e suseso, pero no sa ta ken a tira su amigu. Laker mesa bisa wes ku el a kòrta su kabei bèrdat pero el a hasi esaki pa miedu, despues ku a tira su amigu i no sa ta ken. Ayera den sala di korte e sospechoso a bisa ku e no a tira i tampoko tabatin un arma di kandela den su poder.

Tambe Laker lo mester a bisa su mama ku algun hòmber lo mester a mustra dede riba e víktima Zimmerman, pero ora e kos a tuma lugá e no tabata pará banda di e víktima mirando ku el a keda papia ku algun mucha muhé. Segun fiskal ku den e kaso aki Laker lo mester a tira riba Statie, unda den e grabashon por mira ku Statie a kore bai kai unda el a keda bentá eibou ta ora ambulans a yega. El a bisa ku ta sospechá ku Laker lo mester a lòs un total di 16 tiru ku e arma marka Glock ku e víktima tabatin den su poder, na momentu ku e la keda tirá.

El a pidi un kastigu di 8 aña pa e sospechoso di 20 aña, unda el a bisa ku esaki ta kitando su parti preventivo ku el a sinta. E sospechoso a reakshoná bisando ku e no por komprondé e petishon pa algu ku e no a hasi. 3 di Òktober próksimo lo dikta sentensia den e kaso aki.