Informe di iglesia katóliko ta revelá 3.677 abusu seksual

1102
Esaki segun un informe realisá pa vários universidatnan.
 BERLIN – Un informe interno elaborá pa esnan enkargá ku e Konferensia Episkopal aleman, ta dokumentá un total di 3.677 kaso di abusunan seksual kometé pa 1.670 religioso katóliko for di aña 1946 te ku aña 2014.

Segun a keda indiká, esaki ta remití di un dokumentashon realisá pa ekspertonan di e Universidatnan di Mannheim, Heidelberg i Giessen. E tipo di situashonnan aki ta un problema masivo den seno di iglesia katóliko i ta persistí den aktualidat.Aproksimadamente e mitar di e víktimanan di e abusunan aki tabata menornan di 13 aña di edat i un di kada seis kaso tabata trata algun forma di violashon.

Pa un tersera parti di e víktimanan, e ehekutornan di e abusunan tabata konfesornan òf pastornan ku ta mantené algun tipo di vínkulo religioso.E informe aki a keda enkargá pa e Konferensia Episkopal, segun plannan di e institushon, esaki su konklushonnan lo keda presentá pa e kardenal Reinhard Marx dia 25 di sèptèmber próksimo.

E ekspertonan di e universidatnan a eksaminá alrededor di 38 mil akta i material prosedente di 27 diferente diósesis aleman.Den nan mayoria ta trata di materialnan i aktanan interno ku te ainda nunka a bira konosí i ku segun a keda indiká, tabata estriktamente konfidensial.

E informe parti di e base, ku huntu ku e kaso i dokumentonan, ta eksistí un number skur di hopi otro situashonnan di abusu ku por keda investigá. Esaki sea paso e aktanan a keda destruí òf pa falta di testimonio.E konferensia Episkopal a enkargá e estudio aki na e universidatnan debí na e problema ku a bini relashoná ku abusunan seksual ku a sakudí iglesia katóliko aleman na aña 2010, loke ku a generá un krísis di kredibilidat pa katolisismo aleman.

Na mart di aña 2011, iglesia katóliko a ofresé di paga un indemnisashon di 5 mil euro na kada un di e víktimanan di abusu seksual, ku posibilidat di oumentá e kantidatnan aki pa e kasonan mas grave.Serka di un miar di víktimanan di abusu seksual di parti representantenan di iglesia katóliko a formalisá nan petishon di un indemnisashon pa e abusunan ku nan tabata víktima di dje.

E iglesia katóliko ta e prinsipal konfeshon huntu ku evangéliko na Alemania, ku 24 mion di kreyente kada unu.