Blinda: Jamaloodin bayendo Punda den un vehíkulo blindá.
PUNDA- Ayera mainta, Jorge Jamaloodin a wòrdu transportá di kompleho di sel na Barber pa Punda unda el a keda someté pa promé biaha den 18 luna, na un interogashon dilanti un wes komisario. Ministerio Públiko, a logra haña Jamaloodin na Kòrsou, promé ku el a entamá un proseso na korte venezolano i internashonal pa eksihí un desishon riba su posishon komo detenido sin desishon di un wes.

Jamaloodin for di mart 2017, ta detené riba un petishon di Ministerio Públiko sin intervenshon di un wes imparsial. Pa esaki el a entamá diferente proseso den korte sivil sin haña resultado. Jamaloodin, tabata pendiente  ekspulshon for di Venezuela den forma di un petishon di ekstradishon. Segun abogado di gobièrnu, mr Fransisco tambe Carinne Jansch, tabata falta un firma so di Departamentu di Relashonnan Eksterior di Venezuela pa por manda Jamaloodin Kòrsou. E diskushonnan di Jamaloodin lo bira unu basta tékniko.

Esei si por apliká e art 17 insiso 2 den Areglo di Estado pa eksihí libertat di Jamaloodin. Segun e artíkulo kada persona tin derechi pa eksihí korte nan libertat, si nan aresto a tuma lugá sin intervenshon di un wes imparsial. Korte di Kòrsou a opta pa deklará Jamaloodin no atmisibel den su petishon luná pasá. Pero e tópiko aki sigur, lo bini bèk den su tratamentu penal asina e ta kla pa yega korte. Nèt promé di su ekstradishon Jorge Jamaloodin tabata buskando un deklarashon por eskrito di korte. E deklarashon mester konfirmá ku su aresto no a tuma lugá mediante desishon di wes. Pero Ministerio Publiko tabata mas lihé ku Jamaloodin.

Ayera mainta a someté Jamaloodin dilanti un wes komisario unda el a keda presentá ku e kargonan den su kontra. Ta trata di Germaniun, Passaat i Maximus. Den Germaniun, Ministerio Públiko ta sospechá Jamaloodin di a malversá un suma di 450 mil florin pa remodelashon di e sentro di rekreo Divi Divi. Esaki a sosodé entre 2012 pa 2014. Den Passaat, ku segun Ministerio Públiko ta un derivado di e kaso Bientu, ta sospecha Jamaloodin di a falsifiká dokumentashon den kuadro di e dekreto di “inkeerregeling”. Inkeerregeling ta un areglo pa suidadanonan por a trese sèn bek ku nan a saka ilegítimo for di teritorio di Kòrsou. Por último, ta sospechá Jamaloodin di a organisá asesinato di Helmin Wiels riba 5 di Mei 2013. Den un komunikado di Korte di Apelashon, korte a konkluí i bisa públikamente ku ta Jorge Jamaloodin a organisá i finansiá e morto dje polítiko Wiels na 2013.