Chucky Lozano lo akseptá un oferta di Barcelona den kaso e bini

65

BARCELONA,  — Hirving Lozano a sigurá ayera durante un rueda di prensa previo na e partido di  Champions League kontra di Barcelona,  ku a eksistí interes dje ekipo catalán pa kontrat’é, pero despues e kos a keda tei einan.

Pero den mesun rosea a no skonde su deseo pa un dia hunga einan.  “Lo ta un soño ku sigur lo mi ke pa bira realidat, pero awor aki mi ta konsentrá  ku  PSV i e partido mañan den  Champions League  ku lo  tuma lugá den Camp Nou”, asina e internashonal mehikano a duna di konosé.

Awe PSV lo enfrentá e ekipo Cule.

“Kosnan a bai bon p’ami den Mundial, hopi ekipo a wak den mi direkshon despues di esaki, tabata algu hopi bunita. Barcelona tabata interesá den mi, esaki ta loke mi representante a dunami di konosé, pero mi tabata solamente un opshon.  Lo ta un soño di hunga den un ekipo asina grandi, pero prinsipal awor aki ta PSV, enfoká riba mi wega i disfrutá lo máksimo di esaki”, asina e popular Chucky a duna di konosé.

E kontestanan no a pasá bai sin mas di coach, Mark Van Bommel, di kende solamente a bira wake i kuminsá hari. Inkluso e medionan a puntr’é si despues di e deklarashonnan (den chansa) si mehikano lo keda riba banki,  di kua e la respondé ku un sonrisa.

Chucky a splika ku e selebrashon ku e la hasi ku  Erick Gutiérrez den e gol ku ámbos a partisipá den wikènt ku PSV, di kua e la duna di konosé ku ta algu ku nan tabata hasi for di Mexico.

“ E selebrashon di gol ta algu ku nos tabata hasi tempu nos tabata hunga ku Pachuca na Mexico. Gutiérrez tabata ke pa nos hasié den kaso e oportunidat presentá ku nos kombiná pa anotá un gol”, asina Lozano a terminá bisando.

Fot hirvin: Hirving Lozano a sigurá den rueda di prensa previo na e partido di  Champions League kontra di Barcelona,  ku a eksistí interes dje ekipo catalán pa kontrat’é. E coach di PSV, Mark van Bommel, banda di dje su smail tin vários nifikashon.