Mester atendé asuntu di transporte eskolar

Sitek a tene akshon Lio Plantijn:

759
Willemstad,– Lider di e sindikato SITEK, señor Darius ‘Lio’ Plantijn huntu ku doñonan di bùsnan ku ta transportá muchanan di skol, a disidí ayera ku nan ta sera tur via ku ta kondusí na e garashi di ABC na Buena Vista.

Segun señor Plantijn ta un protesta kontra un mal desishon di gobièrnu pa e medida ku nan a tuma kòrtando den transporte eskolar. E lider sindikal ta splika ku nan a manda un karta pa minister for di 27 di ougùstùs pa splika gobièrnu ku e asuntu aki ta unu anti mucha i ta pedagógiko di duna e muchanan karchi pa kue transporte públiko i tambe pa a pidi un reunion, pero te ku awe no a haña un kontesta di gobièrnu si nan a haña e karta te pa invitá Sitek na un reunion. Lio ta bisa ku a kòrta den supsidio i konsekuensha ta ku no a paga kompanianan ku ta transportá muchanan di skol. E ta bisa ku tin shofùrnan ku no a kobra, otronan ku a tuma retiru fo’i kompania i otronan ku a ta mèldu ziek, paso nan ta bisa tanten nan no kobra nan no ta kore.

Señor Plantijn ta bisa ku Sitek no tin nada kontra ABC pero e manera ku gobièrnu a hasi e kos sin sinta na mesa ku sindikato sin sinta na mesa ku e kompanianan , awor bo ta mira e desaster.

E ta splika ku e asuntu di duna e muchanan karchi no ta algu ku ta solushoná e problema, Plantijn ta splika ku karchi ta kaba na kaminda ku muchanan paso nan tin ku kue dos konvoi i nan ta haña nan ta pidi maestronan sèn pa paga bus pa bai kas.

Lio ta bisa ku tin hóbennan tambe ku tin ku bai lès atardi , pues e karchi no ta pasa paso e karchi ta bálido pa sierto oranan di dia.

“Tin mucha  ta yega lat paso nan tin dòbel ruta, pues un mucha ta sali Tera Kòra baha na Otrobanda, kana bai Punda pa e por kue un bus i bai Steenrijk, pues e ta yega skol lat sigur”, asina señor Plantijn ta splika.

E ta bisa ku ántes tabatin bus ku tabata kore e ruta mesora, pues sali Tera Kòrá baha e mucha na Steenrijk dirèkt.

Mas aleu Darius Plantijn ta splika Vigilante ku e karchinan ta pa hóbennan di 17 aña bai ariba, pero tin mucha di 15 aña ku tambe a haña karchi. “E kos aki ta peliger. Bo ta obligá e hóbennan sali kas 5.30 mardugá ku tur e konsekuensha ku esaki tin”, segun Darius Plantijn.

E ta bisa ku bo ta duna posibilidat manera por ehèmpel, e mucha ta sali trempan pidi su yònkuman pasa busk’é pa nan bai hasi nan kosnan i e yònkuman ta bah’é na skol 7’or i niun hende no ta sa nada. Lio ta bisa ku kontrali na esaki si e tin e transporte eskolar e shofùr ta krea un relashon ku skol i ku kas i si e mucha tin dos dia sin bai skol, mesora e shofùr ta mèldu e mayor i tambe na skol.

Señor Plantijn ta bisa ku e loke a pasa ayera ta djis inisio, i ku si no haña oido e akshon lo eskala. “Esaki ta e promé atvertensia” asina e presidente di Sitek a duna di konosé na Vigilante.