Punda—Manera Vigilante a publiká 2 siman pasá djasabra, MCB tabatin problema serio ku nan sistema di ATM. E problemanan a sigui tambe den transkurso di siman pasa, durante transakshonnan di pagonan mensual, prinsipalmente salario.

Algun kompania lokal ku ta pasa nan salario via di MCB, a notifiká e banko di algun fayo. Empleadonan a notifiká nan doñonan di trabou di saldonan eksesivo riba nan kuenta personal. A sosodé awor ku MCB, debí na problema ku nan sofwèr kual ta kontrolá nan transakshonnan bankario a konfrontá problemanan tékniko. E problemanan a resultá den pago di mas riba dia di salario. Tin empleado kende a risibí su salario 6x e montante ku e tin di risibí. Ta sospechá tambe ku kobradónan di ònderstant tambe a risibí di mas. Ayera, Ministerio di Desaroyo Sosial, Labor i Bienestar (SOAW), a partisipá na su kobradónan di ònderstant ku si akaso por a risibí sèn di mas siman pasá djabièrnè 28 sèptèmber 2018, esta kinsena 21/2018, por fabor no hasi uso di e sèn, sino tuma kontakto inmediato ku e Kas di Bario konserní. Esaki pa evitá kualke inkumbiniensia pa e próksimo kinsena. Pero e aviso tabata lat kaba. Fo’i ayera, Vigilante a risibí e notifikashon, ku hopi kobradó di ònderstant a limpia nan kuenta bai ku tur sèn.