135 mil florin pa luna ta sali na 767 florin pa ora

174
135: Betrian ta repartí 135 grandi den nan 7.Tur kos ta dependé di e sifranan individual i kantidat di orario den e trabou.
Otrobanda—Ayera e suma di 135 mil florin pa Betrian den proyekto di HNO, tabata tópiko di diskushon. En realidat, si kalkulá e suma na tarifa di ora, esaki ta sali normal na 767 florin pa ora, lokual ta komun i koriente den tipo di proyektonan di tal magnitut.

Lokual mester bai forma e tópiko di diskushon ta e konstelashon di e 7 personanan ku HNO ta papiando di dje i kuantu ora den práktika ta hinkando den e proyekto. E 767 florin pa ora, ta basá riba un punto di salida, ku tur 7 persona ta gana igual miéntras tur ta trahando 26 dia largu 8 ora pa dia riba HNO. Esei probablemente no ta e kaso. Te ainda e splikashon korekto tokante e asuntu ta lo siguiente: “ Sr. Betrian via Landsbesluit 2017/21228 fecha 5 sèptèmber 2017 a wòrdu apuntá komo Ministeriële Regisseur en Toezichthouder (MRT), un título diseñá bou di Gabinete di Turno Pisas. E enkargo ku Sr. Betrian a haña i e kompleksidat den e proyekto spesífiko i di salubridat en general ta asina grandi ku Sr. Betrian a forma un tim ku ta konsistí di ekspertonan finansiero, eksperto di project management, eksperto hurídiko, eksperto change management, eksperto governance, office management i sekretaria.
E gastunan di e MRT i e tim ta ANG 135.000 pa luna. Pa e montante aki e tim ta konsistí di 7 persona i tambe ta hür konsultent di tres kompania. Den e montante tambe tin un kantor (kamber) i disposishon di un sala di reunion, tambe e montante tin biahe i estadia. E tareanan di e MRT ta deskribí den e Landsbesluit ta enserá por ehèmpel: Kordinashon di supervishon i dirigí e proyekto HNO, Ehekutá e 24 puntonan di desishon di Konseho di Minister 23 maart 2017,Kordinashon di evaluashon di parti di e proyekto, Tene kombersashon tokante konstrukshon, transishon, ICT, ekipo médiko, etc. di HNO, Negoshá ku SEHOS tokante MOU di 20 sèptèmber 2013, Posishoná HNO den e sektor di salubridat i sera konvenio alkaso, Kordiná e protokòl riba koperashon riba tereno di salubridat públiko, kuido hospitalario, SVB entre Hulanda, Aruba, Sint Maarten i Boneiru, Investigá e meta futuro di e edifisionan di SEHOS, Supervisá proyektonan relevante pa HNO den Ministerio di GMN i otro ministerionan”. Pues e suma di 135 mil florin no ta bisa nada si no tin orario i ken ta esnan den e grupo di 7 pa Betrian.