300 florin ta e pago pa Drone baha telefòn den Prizòn

Dimes droga ta dependé e kantidat ta sa e preis

232
Willemstad—- E drone ku djadumingu a ser konfiská sigur tabata un di esnan ku tabata hasi e buelo riba Prizon unda prinsipalmente e tabata bai  baha droga i tambe telefon den e instituto.

Den un entrevista na televishon Señor Floran ku ta na mando di Prizon a splika ku ta hasiendo lo máksimo esfuerso pa asina evitá ku e drone por hasi entrega di droga i tambe telefon den e instituto. Por a komprondé ku últimamente asta ta pone bewaker para na pòst prinsipalmente pa wak yegada di Drone pa konfiská e artíkulonan ku e ta trese kuné pero esaki tòg tabata trese kuné ku e merkansianan tabata yega den man di e detenidonan. Ora tabata pensa ku ta den un blòk so e merkansianan tabata destiná,  tabata bai baha esakinan den un otro blòk i e detenidonan tabata sòru pa esaki yega su destino dor di pasa esaki di un blòk pa otro te na momento ku e merkansia yega serka e doño esta esun ku a paga. Por a komprondé ku un telefon entrega via di un Drone ta mas barata ku e otro sistema ku esaki tabata drenta Prizon. Via di un Drone un telefon ta kosta 300 pa  baha den Prizon i yega serka e detenido miéntras e otro manera ku e telefon tabata drenta den Prizon ta kosta 700 florin. Den kaso di droga esaki tin un otro preis debí na e kantidat di droga pero ta kuminsá di 500 florin bai ariba. Vigilante por a komprondé ku e Drone ku ta ser usa esta sigur esun ku a keda konfiská djadumingu último ta unu bon ekipá. E drone aki sigur no tabata baha den e instituto pero tabatin un manera un grap instalá na e pianan unda e tabata tene e merkansia ku mester wòrdu hiba i ora ku e bula yega riba e blòk e ta habri e grap laga e merkansia kai unda kasi semper tin un detenido pa fangu esaki òf si e kai abou mes ta kue esaki i mesora bai skonde. Den prizon bo tabata tende ata e “ Para” ta bin esta e drone ta yegando.  Tin sistemanan instalá riba e Drone unda fásilmente por mira kuantu buelo esaki a hasi i tambe unda e la hasi esakinan. Sigur esaki ta den investigashon den e dianan aki.