Ennia i Banco di Caribe mester a firma pa Ansary pasa 282 mion dòler na bono

2465
282 mion dòler: Jardim buskando e konstelashon kon a traspasá 282 mion dòler na bono via aktivonan den Grupo Ennia Caribe Holding.
Punda–  Manera publiká ayera den Vigilante, Hushang Ansary na yüni pa novèmber 2017, a trese kambionan grandi den su bolsa di invershon. E kambionan aki tabatin konsekuensha pa kompanianan bou di Ennia Holding na Gorsiraweg.

E situashon na Ennia Caribe Holding ta sigui delikado, miéntras Banko Sentral ta tene aseguradonan dje kompania den insiguridat. Entretantu, Ansary for di yüni 2017 a anunsiá den un “kompra i benta di akshon”, ku Kirby Corporation balorá na 5 bion dòler riba merkado di kapital, ta kumpra unu di su kompanianan kual ta Stuart and Stevenson. Esei a tuma lugá na yüni 2017 i na sèptèmber 2017, e grupo di Ansary a kumpra 8.8% bek den Kirby Corporation. Kirby a kumpra Stuart and Stevenson i nan a paga 50% den akshon i 50% na kèsh, esta aktivo den forma di likides. Na Kòrsou, direktornan di EC Investment, EC Holding, Ennia Caribe Holding mester a firma, pasobra den e transakshon di akshon tabatin 280 mion dòler balorá na bono manehá pa EC Investment i EC Holding. Ta trata di aktivonan, propiedat di Ansary den un konstrukshon kompliká. Ta sospecha ku e transakshonnan aki a trese un desbalanse den e konstelashon di aktivo na Ennia Caribe Holding.

Aktualmente, Banko Sentral di Kòrsou ta tratando a todo kosto pa logra rekuperá e aktivonan di Ennia Leven. Manera ta konosí, 23 di òktober próksimo den Korte di Distrikto na New York, Banko Sentral tei buska rekonosementu di su medidanan imponé na Ennia Holding, riba teritorio estado unidense. Un intento kasi imposibel pa logra.