Punda– HNO, prinsipalmente e sitio pa stashoná vehíkulo, por ta unu di e motibunan dikon Ben Whiteman a presentá komo lider pa Pueblo Soberano. Esei, si tradusí e karta di retiro entregá awe pa Mac Cijntje, co-fundadó di e partido.

Segun Mac, tantu Ben Whiteman komo Ivar Asjes tin hopi di splika dikon HNO a sali mas karu. Nan dos, tabata esnan kende a kontribuí na por lo menos 50 mion èkstra despues di a disidí pa kontstruí un luga di stashoná vehìkulo. Cijntje, den su karta a bisa ku HNO tabata unu di e motibunan pa su retiro. E fundadó di Pueblo Soberano, ta bisa ku no tabatin niun desishon den Hunta di Minister pa konstruí un sitio di stashoná outo. E desishon sostené pa Asjes i Whiteman a okashoná gastunan adishonal pa konstrukshon di HNO.
Ta trata di un kalkulo general, ku en berdat ta pone e gastunan yega unda Mac ta argumentá.  Segun profesor Donald Shoup, e averahe pa konstruí un sitio pa stashoná outo subteraneo ta kosta 34 mil doler pa “vak”. Esta kada un sitio ta kosta 34 mil doler. Na HNO a laga traha 525 sitio pa stashoná vehíkulo. Esaki no tabata  den e plan origibal di HNO. Donald Shoup ta un profesor enombrá na universidat di UCLA i konsidera un “guru” den planifikashon urbano. 525 luga di pone outo biaha 34 mil doler,  ta yega na kasi 32 mion florin.