Jeffrey Nieuwenhuyzen ta gana promé torneo di Karibe den biar

52
Premio pa Jeffrey.
WILLEMSTAD—‘Caribbean Union of Billiards Sport’ ta super satisfecho ku e resultado di nan evento. E organisashon, ku ta presidí pa Michael Arvelo i ku sobra miembronan, manera entre otro Robert Sille, David Prins i Allan James di Trinidad a traha duru pa por a realisá e promé aktividat di biar di Karibe.

E evento a konta ku partisipashon di 17 atleta for di entre otro Barbados, Trinidad i tambe Kòrsou. Un estorbo grandi pa partisipashon di e otro hungadónan di sobra islanan di Karibe, a resultá ku preisnan pa ticket pa yega Kòrsou, tur tabata riba mil florin, ku ta sumamente karu.

E evento a tuma lugá na ‘Le Mem Sportsbar’, di Isidro Noor, na Sta. Maria, kual organisadónan ta gradisí pa su kolaborashon.

Tabata un kompetensia ku a tuma lugá resientemente, unda den dos partidonan di kuart final, den buèlta di ganadó, Jeffrey Nieuwenhuyzen a gana di Carlos Poyer di Trinidad 9-3 i Lyndon Ramkissoon, tambe a gana Allan James, 9-3. Ámbos ta di Trinidad.

Seguidamente den kuartfinal, den e buèlta di pèrdèdó, ku Sybren Boekhoudt, ta gana Aaron Raghoonanan di Trinidad 9-5.

Den semifinal, den buèlta di ganadó, tabata Jeffrey, kende ta gana Lyndon 9-3 i asina ta pasa pa final.

Lyndon den buèlta di pèrdèdó, den un tremendo partido ta logra di gana Sybren 9-8 i asina, klasifiká pa final, ku tabata di un banda unda ku Jeffrey no a duna ningun oportunidat i konvinsentemente ta titulá kampion, ganando Lyndon, ku skor di 11-7.

E kompetensia a tèrminá, ku empatá na puesto 5, Allan James i Carlos Poyer. Puesto 4 a bai pa Aaron Raghoonanan, mientras ku Sybren Boekhoudt a resultá na terser puesto.

Supkampion a resultá Lyndon Ramkissoon, miéntras ku e promé kampion di CUBS, ta Jeffrey Nieuwenhuyzen.

Premionan a keda entregá pa presidente Michael Arvelo i na nòmber di Cubs, Allan James a gradisí tur partisipante i mesora tambe a anunsiá ku e próksimo evento lo tuma lugá den luna di mei 2019, na sea Trinidad of Barbados.