Darius Berenos 2 di mundu den e deporte di bela

86
Darius Berenos.
WILLEMSTAD—Resientemente e asosashon internashonal pa e klase Sunfish (ISCA), a organisá su kampeonato mundial na Wrightsville Beach, North Carolina na Estádos Unídos.

Esaki ku partisipashon di mas ku 70 belarista prosedente di 12 diferente pais. Kòrsou a wòrdu representá pa e hóben Darius Bérénos, di 16 aña di edat, kende ta nos kampeon nashonal hubenil i den bida diario, alumno na Radulphus College.

Kompetensia durante di e evento, tabata fuerte i bou di diferente kondishon ku a varia, di bientu hopi duru ku ola haltu di mas ku 2 meter, te ku dianan sin bientu, debí na e orkan Michael ku a pasa no muchu leu for di North Carolina.

E boto Sunfish kua ta popular lokalmente ta un klase ku ta parti di e programa Sentro Amerikano i di Karibe i e programa Panamerikano.

Ku bista riba e Weganan Panamerikano otro aña na Lima, Perú, hopi pais riba nos kontinente ta hinka hopi energia i fondo den e klase pa asina ta mas mihó prepará ku ta posibel pa e weganan benidero na Lima.

Bérénos ta tin un ekselente presentashon na e mundial i a terminá na e di dos lugá den e kategoria hubenil, lagando solamente e kampeon kolombiano, kende ta Simón Gomez di 17 aña su dilanti, kende a titulá kampeon mundial hubenil.

Den e kategoria “overall”, ku a ta konsistí di adulto i hóben for di 16 aña, e peruano Jean Paul Trazegnies, a titulá kampeon mundial, aki Bérénos a finalisá na di 11 lugá, lagando mas ku 60 atleta, oriundo di paisnan grandi manera entre otro Spaña i Italia, pero tambe islanan den bisindario manera por ehèmpel Puerto Rico i Bahamas, su tras.