Simposio Aritmétika i Matemátika

102
Otrobanda– Fundashon Tur Ta Konta en kolaborashon ku Universidat di Kòrsou Dr. Moises Da Costa Gomez, ta organisá otro siman pa e di 3 aña un simposio di Aritmétika i Matemátika ku e aña akí ta karga e nòmber “Ken je tafels”.

 

Fundashon Tur Ta Konta i e Universidat di Kòrsou ta duna ku e simposio akí un bes mas un aporte na e proseso di konsientisashon i ta suprayá e importansia di bon enseñansa di Aritmétika i Matemátika pa nos muchanan, nos forsa laboral i e komunidat den su totalidat.

 

E oradónan ta prof. dr. Ludo Verhoeven (NL) ku djaluna anochi 22 di oktober lo duna un charla pa e publiko general rondó di e tema “De rol van taal bij leren rekenen; een meertalig perspectief”. Djamars mainta Verhoeven tambe lo guia un seshon interaktivo riba nivel di maneho den enseñansa rondó di e tópiko aki.

 

Banda di e charla, dos eksperto di e instituto Hulandes Menne, lo siña e studiantenan di LoFo i maestro di skolnan FO pa medio di workshop strategíanan nobo pa sina alumno tabla.

E kasi 200 tutor di Fundashon Tur Ta Konta tambe lo haña un workshop kòrtiku di e dos eksperto akí. A funda e “Menne Instituut” den 2008 i nan ta ofresé kurso i material di aritmétika den nan programa di treinin “Met Sprongen Vooruit”.

 

Lo usa e idioma Hulandes i e simposio lo tuma lugá na UoC.

Pa mas informashon: bishitá e wèpsait www.turtakonta.com/symposium2018.

 

Corendon, Renaissance Curaçao Resort & Casino, Avila Beach Hotel, Menne Instituut i Bureau Nascholing ta hasi e evento grátis.