Selekshon di Reino a sali pa Colombia

123
Miembronan di e selekshon beisbol U-23 di Reinio.
WILLEMSTAD—Danki na coach Ben Thijssen i kolaborashon di ‘Curaçao Baseball Development Foundation’ (CBDF) i Koninklijke Nederlandse Baseball en Softball Bond (KNBSB), ku e selekshon di beisbòl di Reino, pa loke ta kategoria U-23, tabata na Kòrsou.

Esaki pa algun dia, unda a hiba algun sekshon di práktika, promé ku e buelo di awe pa Colombia.

E selekshon di Reino U-23, ta biaha pa bai partisipá na e kampionato Mundial. Ta trata di ekipo ku ta konsistí di vários pelotero lokal, ku tantu ayera komo ántayera a hiba sekshonnan di práktika nan so i tambe weganan di fogeo, na Tio Daou Ballpark.

Miéntras tantu djaweps, dia 18 òktober 2018, parti mainta, e selekshon U-23 lo bolbe train i den oranan despues di mèrdia, lo sali pa Barranquilla, Colombia.

E promé wega di e selekshon di Reino den e mundial na Colombia, ta programá pa tuma lugá, djabièrnè dia 19 òktober 2018, kontra di e pais anfitrion, Colombia.

E wega aki lo mira akshon, djis despues di apertura ofisial di e kampionato mundial, ku lo konta ku partisipashon di 12 pais.

E ekipo U-23 di Reino ku ta konsistí di 24 pelotero, di kual 11 picher, 3 kècher, 6 infielder i 4 outfielder, ta konta ku algun hungadónan lokal, kende nan ta entre otro Wendell Floranus, Nelmerson Angela, Cedeon Langguth, Stephen Vidal, Sherton Apostel, Junior Martina, Swintly Lint, Aldrich de Jongh i Rachid Engelhart.

Deporte Vigilante i tambe CBDF, ta deseá e selekshon di Reino tur klase di éksito den e kampionato mundial na Colombia. Konhuntamente algun foto, di parti di e training ku a tuma lugá na parke Tio Daou.