Brandley Kuwas ku 2 i Bradley Martis ku 1 gol

211
Brandley Kuwas.
HULANDA—Durante di e fin di siman ku ta tras di lomba, un biaha mas nos fubolistanan kende ta militá den futbòl na Hulanda, a mira akshon ku nan respektivo ekiponan. Esaki den diferente divishonnan.

Entre esakinan tabata Brandley Kuwas kende ta miembro di nos selekshon nashonal, ku a anotá 2 gol ayera. Esaki hungando kompletu pa su ekipo Heracles, ora ku nan a gana di FC Groningen den stadion Polman. Na sosiegu e wega tabata empatá na 1 gol. Kuwas a anotá na minütnan 78 i 90, pa seya e triunfo di su ekipo, poniendo e skor nan respektivamente 3-1 i 4-1, den wega bálido pa Eredivisie.

Tabata den stadion De Kuip ku miembro di nos selekshon Darryl Lachman a hunga kompletu pa PEC Zwolle ora ku nan a sufri derota di 3-0 na man di Feyenoord, unda Tyrell Malacia tabata na banki i no a logra pa hunga ayera den Eredivisie.

Otro miembro di nos ekipo nashonal di futbòl, Jurich Carolina hungando durante di hinter e 90 minütnan di wega pa NAC Breda, unda Vurnon Anita a inisiá na banki i drenta pa hunga durante di e último 15 minütnan di partido pa Willem II, a parti punto, empatando na 2 gol ayera, den Eredivisie ayera.

Elson ‘Sontje’ Hooi, kende tambe ta parti di nos selekshon di futbòl di Kòrsou, a inisiá i hunga te na di 68 minüt ayera, unda Giovanni Troupee a hunga 90 minüt, ámbos pa ADO Den Haag, den wega di Eredivisie, ku nan a pèrdè 2-0 kontra VVV Venlo, den van der Valk stadion De Koel.

Miéntras ku djasabra hungadó den minütnan di deskuento, Bradley Martis ta sòru pa Sparta empatá na 2 gol pa finalmente tambe gana 3-2 di AFC den segundo divishon. E wega aki a sosegá empatá na 1 gol.

Denzel Dumfries a inisia i hunga 57 minüt, unda e tabatin un asistensia, miéntras ku kiper Eloy Room i Armando Obispo tabata na banki sin hunga, djasabra pa PSV, ora ku nan a suta FC Emmen 6-0 na kas den Eredivisie. Jafar Arias a inisiá i a hunga 88 minüt pa e ekipo pèrdèdó.

Ricardo van Rhijn a hinka otro outogol. Esaki na di 88 minüt di wega, ku partido den Eredivisie empatá 1-1, djasabra tras di lomba. Esaki a pone ku su ekipo AZ di Alkmaar ta sufri derota di 2-1 na man di FC Utrecht. Tabata seguidamente tambe ku e ta wòrdu remplasá, despues di a inisiá den e ekipo básiko.

Sherel Floranus a hunga 90 minüt den wega ku su ekipo Heerenveen a sufri goliada ku skor di 4-0 na man di Ajax, den Eredivisie.