Leandro Bacuna ku asistensia pa seya triunfo di Reading

236
Leandro Bacuna.
INGLATERA—Den weganan ku a hunga na Inglatera, tambe Kòrsou tabatin diferente futbolista ku a mira akshon, durante di e fin di siman ku a pasa.

Ayera Patrick van Aanholt a hunga kompletu den wega ku su ekipo Crystal Palace a sufri derota den Premier League. Un ke otro ku skor di 2-0, despues ku e wega a alkansá sosiegu sin anotashon kontra Everton den Goodison Park.

Jurgen Locadia a inisiá na banki i drenta na minüt 16 pa asina hunga te final pa Brighton & Hove Albion, ora ku nan a gana di Newcastle United den Premier League djasabra último.

Juninho Bacuna tabata na banki i no a logra pa mira akshon pa Huddersfield Town, den wega ku nan a sufri derota mínimo na man di Liverpool, djasabra tras di lomba.

E mediokampista Leroy Fer a inisiá i hunga 70 minüt pa Swansea City. Un ke otro djasabra ku a pasa den wega di Championship, ora ku nan a sufri derota mínimo.

E mediokampista di nos selekshon di futbòl Leandro Bacuna, a hunga durante di hinter wega pa Reading den Championship djasabra. Esaki den wega ku nan a topa Millwall i a gana 3-1, unda Bacuna tabatin un asistensia. Tabata faltando 4 minüt pa e pitaso final, ku e ta duna asistensia pa su ekipo seya e triunfo, ora nan anotá nan di 3 gol i pone e skor final 3-1.

E kapitan di nos selekshon nashonal di futbòl, ‘Cuco’ Martina a hunga 90 minüt pa Stoke City den wega di Championship, pero no por a evitá ku su ekipo a kai vensí 1-0, na man di Brimingham City djasabra último.

Den wega di League 2, Gevaro Nepomuceno, kende ta otro di esnan ku ta ku nos selekshon nashonal, a inisiá na banki i drenta na sosiegu pa hunga den segundo mitar pa Oldham Athletic. Esaki den wega ku nan a kai vensí 1-0 kontra Port Vale djasabra.