Esther Cheri no ta haña hustu ku el a sinta 18 dia den prizòn

533
WILLEMSTAD,– E kaso Valencia sigur ta un kaso ku lo bai keda hala atenshon den próksimo simannan mirando e akusashon i tambe petishon di kastigu di prizòn di parti Ministerio Públiko.

Den e kaso aki Esther Cheri kende ta  un sospechoso den e kaso a trese vários punto dilanti den su último palabra, unda e la hasi esaki den vários paginá ku e la presentá kuné. El a bisa ku e no ta haña e manera ku a detené bon i tampoko kon tur kos a kana.

Loke el a trese dilanti ku sigur a hala atenshon ta e echo ku el a sinta 18 dia den prizòn ku algun detenido ku a kometé echo serio. El a bisa ku den e kaso aki tabata papia di echo ku probablemente e mester a kometé.

El a trese dilanti ku pa dia nan largu korant a persiguié, unda el a puntra su mes ku Ministerio Públiko a tene kuenta ku su situashon personal. El a bisa ku despues di algun luna basta ketu di e kaso, anja pasá pa ta mas eksakto 6 di desèmber el a haña un yamada.

Mas aleu el a trese dilanti ku na e okashon aki tabata Landsrechersche ku mester a yama pa e bin deklará. El a bisa ku su deklarashon i  tambe su koperashon ku Ministerio Públiko tabata en bano. Mas aleu el a trese dilanti ku Ministerio Públiko tabata dispone di grabashonnan di telefòn, miéntras tambe nan tabatin archivo di kòmpiuter.

Cheri a trese den su último palabra ku den e añanan ku el a traha den departamento na vários okashon el a duna keho na Ministerio Públiko i tambe na polis, pa sierto kosnan ku tabata bai robes. El a bisa ku na vários okashon el a bisa Minister tambe, pero e no ta komprondé dikon ta wak den solamente un direkshon.

El a splika ku apesar di tur e kosnan aki Ministerio Públiko ta skohe e, huntu ku 2 kolega mas pa mustra dede riba dje, unda finalmente a asta pidi libertat pa un di nan. El a bisa mas aleu ku e sistema di operá di Minister Públiko ta komprendibel unda ta detené hende sin investigashon ta kla, miéntras despues ta dagfar e persona.

Cheri a deklará ku e ta kontra di tur esakinan i ku esaki tabatin hopi konsekuensia pa su famia.