Petishon di kastigu pisá den kaso di 100 kilo droga i 12 arma

689
Petishon pisá den kaso di 100 kilo kokaina.
WILLEMSTAD,– Ayera a trata un kaso basta serio unda a konfiská kantidat grandi di droga i  tambe arma di kandela.

Tabata 9 di yüni último ku a logra para un pikòp ku tabata kontené bastante kos ilegal. Ta trata aki di Haitham Osorio, William Chavez Lugo, Humberto Salazar i Jaysen Straker. A haña un total di 102.640 gram di kokaina unda tambe a haña 12 arma di kandela a bordo di e pikòp.

Den e kaso aki e hòmber Lugo i tambe Straker mester a trata na transportá e droganan, unda abitantenan den aria di Banda Bou a yama polis bisando ku tin ilegal a yega tera. Segun fiskal e hòmber Osorio tabata esun ku ta duna instrukshon unda e tabata bisa nan pa wak boto i  avion di warda kosta.

El a bisa ku Straker tabata riba bròmer i esaki no ta kita ku e no ta involukrá mirando ku e tabata huntu ku nan transportando kos ilegal segun fiskal. A haña Osorio ku un telefòn, unda a haña vários potrèt i grabashon den dje.

Segun fiskal a asta hanja un potrèt unda ta mira Straker ku e bròmer promé ku e dia ei. Fiskal a bisa ku Straker a deklará ku e no konosé niun di e hende nan ei i no tin nada di aber ku loke a keda konfiská. Mr. Koert a bisa ku por proba ku e droganan i armanan ta di Osorio i por proba esakinan.

El a bisa ku tin sufisiente prueba pa kastigá tur e sospechosonan. El a pidi 7 aña di prizòn pa Osorio, 6 aña pa Chavez Lugo, 5 aña pa Salazar i 5 aña pa Straker.