PAR ke mira tur hende den reunion riba Rif

162
Ana Maria Pauletta
Punda—Frakshon di PAR ke mira tur hende den reunion riba e problemátika di Rif. Esaki por konkluí despues ku miembro di parlamento pa PAR, Ana Maria Pauletta  a manda súplika pa agregá e Federashon Otrobanda tambe na e reunion ku frakshonnan den koalishon a pidi. Den su karta na presidente Millerson, Pauleta a pidi pa “Agregá Federashon Otrobanda na reunion di komishon sentral enkuanto desaroyo di e aria di Rif”.

Ta asina ku PAR a tuma nota di un karta, fecha 31 di òktober 2018, pa un reunion di komishon sentral ku e tópiko ‘petishon pa reunion di komishon sentral enkuanto desaroyo di e aria di Rif’. E reunion di komishon sentral  a wòrdu pidí pa parlamentarionan señora Moses, Señor Cordoba i señor Rojer. Segun e parlamentarionan tin falta di klaridat i preokupashon rondó di e proyekto pa desaroyá Rif.  Pa ku e reunion aki nan lo kier a invitá:

  1. Minister sra. Jesus-Leito, VVRP;
  2. Representantenan di OW;
  3. Representantenan di e departamento enkarga ku riolering;
  4. Representantenan enkarga ku disefio di kaminda;
  5. Representantenan di Fundashon Rif;
  6. Representantenan di Carmabi/ Amigu di tera.

Frakshon di Partido Alternativa Real ta kere ku e proyekto aki tin embergadura pa e área di Otrobanda kompleto i ta sinti falta den e lista di organisashon invitá, Federashon Otrobanda, ku ta e organisashon paraplü  di Otrobanda.  Ademas den e lista di organisashonnan ta falta e organisashon ku tin bou di su enkargo e proyekto di desaroyo di e área, esta Curaçao Ports Authority (CPA). Teniendo kuenta ku loke ta keda ariba menshoná, frakshon di PAR, ku indulgensia di e 3 parlamentarionan ku a hasi e petishon pa e reunion di komishon sentral konforme di artíkulo 33 di Reglamentu  di Ordu di Parlamento, ta hasi e petishon pa inkluí: 1. Representantenan di Federashon Otrobanda; 2. Representantenan di CPA.