6 hòmber detené na Utrecht pa lote di imitashon paña di marka

40
lote di paña na balor di 200.000 euro konfiská, kompanianan a hasi denunsia
UTRECHT—Polis a detené 6 hòmber den fin di siman na Utrecht ku tabata bende paña di marka pero ku no ta di marka.

Agentenan a konfiská un lote di paña na balor di 200.000 euro. Ta trata di 4 hòmber di Utrecht entre 21 pa 53 aña i dos hòmber di Rotterdam di 40 i 23. E prome detenshonnan a kai djasabra. Ta funshonarionan di servisio Infrastruktura di unidat sentral a kontrolá un vehíkulo riba Leidsche Rijn. E funshonarionan a haña un lote grandi di paña di marka nep ku e shofùr no tabatin bòn of prueba p’e. seguidamente e shofùr i otro okupante a keda detené. A konfiská e lote. Un dia despues, djadumingu, polis a haña un lote mas grandi den un deposito riba un tereneo industrial na Utrecht. E doño (33) di e edifisio a keda detené. Tambe a konfiská telefònnan, 4000 euro i un outo. Na e adres di kas di e sospechoso a detené tres hòmber despues na momentu ku nan tabata saka merkansia for di truk. E sospechosonan a rekobrá nan libertat despues di interogashon. Polis a start un investigashon riba e trafikashon i prosedensia di e merkansia. Tur e kompanianan di e pañanan manera Philipp Plein, Dolce & Gabanna i Dsquerd a hasi denunsia. Segun polis e merkansia por ta dañino pa salubridat den sierto kasonan dor di uso di material robes.