Apelashon di Rode Kruis: stòp di graba aksidente i yuda víktima

33
Rode Kruis ta start kampaña kontra grabashon aksidentenan
UTRECHT—Hendenan mester stòp di graba heridonan despues di un aksidente, segun un apelashon urgente di Rode Kruis.

E organisashon di asistensia ta bisa ku 90% hulandesnan ta haña esaki inaseptabel i ta kuminsá un kampaña riba media sosial. Grabashon di situashonnan grave ku telefòn ta parse di a bira un sorto di outomatismo segun Nico Zuurmond di Rode Kruis. E tempu ku un hende ta usa pa graba e aksidente por keda usa pa yama 112 emergensia i duna prome asistensia. Pasobra hustamente esaki ta di importansia pa bida den prome minutnan despues di aksidente. Djasabra 45 outomobilista a haña un but pasobra nan a graba òf saka foto di un aksidente riba A58. Resientemente tambe a graba via bentana di un restorant kon un hòmber tabata keda reanimá. Esaki a hasi un agente hopi furioso ku a skirbi un blog riba facebook di e suseso. Ta algu ku ta sosodé kontinuamente tur kaminda segun sindikato di polis den un reakshon djasabra riba akontesimentunan. Ta parse ku no tin limite segun e sindikato. Agentenan ta bisa ku nan no por hasi nada ora hende ta graba pasobra graba riba kayanan públiko no ta prohibí, si den kaso ku ta usa un telefòn bou di stur. Investigashon di Rode Kruis ta mustra ku kasi 90% di hulandesnan no ta haña grabashon di aksidentenan aseptabel. E organisashon a duna instrukshon na un kompania pa hasi pregunta online na 700 hende riba e tema. 68% ta kere ku grabashon di situashonnan di emergensia por ta util por ehèmpel pa material di prueba. Un grupo chikitu ta haña ku graba ta bon ora prome asistensia a yega kaba i nan mes no por hasi nada. Un tersera parti di respondentenan lo no pidi esnan ku ta graba stòp di hasi esaki. Na Alemania e problema ta keda solushoná pa servisionan di asistensia mes. Aki ta prohibí pa graba òf saka foto di un víktima sin su outorisashon. E but pa esaki por yega te 1000 euro.