Hulandesnan estafá pa miones riba media sosial

39
hulandesnan estafá pa 5 mion euro riba medianan sosial
AMSTERDAM—Mas hende ta keda estafá via propagandanan riba media sosial, segun outoridat di konsumidó i merkado ACM.

ACM ta kalkulá ku den 2017 hulandesnan a keda estafá pa 5 mion euro. E estafa ta tuma lugá na diferente manera: tin hende ta paga produktonan ku nunka no ta keda entregá òf klientenan ku ta haña kalidat defisiente di produkto ku nan a paga karu p’e òf tin biaha ta haña algu kompletamente diferente. Segun ACM medianan sosial manera Facebook i Instagram ta atraktivo pa komersiantenan froudulento. No solamente nan ta hasi mas uso di media sosial, pero e ta fásil pasobra nan ta habri un website, hasi propaganda, bende pa djis despues sera esaki den 3 dia. Banda di esaki konsumidónan riba media sosial ta ménos krítiko. Nan ta mira algu, kumpra mésora sin kompará e produkto òf wak evaluashonnan di e webshop. Pasobra e propagandanan ta asina profeshonal, e hendenan no ta realisá ku por ta froudulento. Den 2017 klientenan ku ta kumpra online a keda estafá pa 50 mion euro. No tin sifranan konkreto di estafa via media sosial pero ACM ta kalkulá ku 10%, ku ta 5 mion euro, ta via medianan sosial. Nan ta hasta kalkulá ku un riba 5 propaganda ta froudulento pero organisashon Thuiswinkel ta refutá esaki segun ACM. Un kampaña di ACM mester hasi konsumidónan mas konsiente di risikonan. Nan ta konseha pa kontrolá esun ku ta ofresé e propagandanan riba medianan sosial.