12 supuesto kriminal i 2 agente polisial ta fayesé den konfrontashon

60
Ámbos agente ku a pèrdè nan bida tabata tatanan di famia.

CARACAS – E direktor di Kuerpo di Investigashonnan Sientífiko di Venezuela, identifiká komo Douglas Rico, a informá ku un total di 12 supuesto delinkuente i dos funshonario polisial a keda asesiná durante un konfrontashon ku a keda produsí na e estado di Carabobo den fin di siman tras di lomba.

Segun esaki a indiká, e grupo di delinkuente aki a sa di saka mas di 200 famia ku tabata biba den e sektor. Ademas a indiká ku a rekuperá un total di dos fusil i diferente otro tiponan di arma di kandela, entre nan dos granada.

A indiká ademas ku e organisashon kriminal aki tabata dediká nan mes na ladronisia di vehíkulonan, ekstorshon i homisidio i ku a provoká ku mas di 200 famia ku tabata den e sektor, mester a keda evakuá.

Den un komunikado di outoridatnan, a informá ku funshonarionan ku a pèrdè nan bida a keda identifiká komo inspektor José Rafael Cassiany Casseres, ku 17 aña di servisio, i tambe e detektive Luis Alfredo Querales, ku tres aña di servisio. Ámbos tabata tatanan di famia.

Den e operativo pa desartikulá e gèng aki, a konta tambe ku partisipashon di Komando Nashonal Antiekstorshon i Sekuestro.

Venezuela a registrá aña pasá, un total di 89 morto violento pa kada 100.000 abitante, loke ku ta keda tradusí na un total di 26.616 víktima. E sifra aki ta mantené e pais na segundo lugá riba lista di esnan mas peligroso di mundu, enkabesá pa El Salvador.