18 morto i vários herido despues di aksidente entre bùs i pikòp

58
Bùs ku a keda di bòltu despues di aksidentá.

LIMA – Un total di 18 persona a pèrdè nan bida i otro 39 mas a resultá heridá den un aksidente entre un bùs i un pikòp den oranan di djadumingu anochi lat. Esaki na e karetera di e region di Puno, na sùit di Perú.

E aksidente a keda produsí na e karetera di Binacional i na altura di e distrito di Desaguadero, na e provinsia di Chucuito. Aki ta unda e bùs a impaktá di forma frontal ku e pikòp.

E bùs di su banda tabata dirigí su mes pa e lokalidat di Yunguzo, na frontera ku Bolivia, direkshon e siudat di Tacna. Esaki miéntras ku e pikòp tabata transitá den sentido kontrali.

Te ainda outoridatnan ta intentá di identifiká esnan ku a pèrdè nan bida, entre kua tin 12 hende muhé i tambe un menor di edat, miéntras ku esnan heridá a keda trasladá pa hospitalnan di e siudat di Juli i Puno.

Outoridatnan a presentá na e sitio di e insidente pa asina duna un man unda ta nesesario i seguidamente sigui ku e investigashonnan den e kaso.

Aksidentenan di e magnitut aki ta algu masha komun na kareteranan di Perú i nan ta keda kousá den nan mayoria pa imprudensia di shofùrnan, mal estado di kayanan i vehíkulonan òf pa kondishonnan di geografia.