Alex Pieternella di Forsa Dos ku piesa nobo riba merkado

50
Su piesa nobo ta zona bon.

WILLEMSTAD,—-E kantante di agrupashon musikal Zudup Hopi Forsa ku ta Alex Pieternella a kaba di graba su piesa nobo ku su titulo ta “E’n ta bira nada”, i esaki ta un komposishon di Hunnuley Felicia i e areglo ta den man di Swendy Margaritha i Jerrel “Djëgo” Paula.

Mester bisa ku e aña aki Alex a bandoná agrupashon musikal E.R.A. i bai kas bèk na e banda ku seis aña pasa e tabata forma parti di dje ku ta Forsa Dos. E moveshon aki a lanta masha hopi stof den nos farándula dia ku e la bira konosí.

T’asina ku esaki ta e promé biaha ku  e kantante kompositor Hunnuley Felicia ta komponé un piesa pa Alex i tambe den e ámbito di Kòmbèk. ‘E Mulina’, tabatin e honor di por e tende e piesa nobo di Alex Pieternella, nos tin ku bisa ku sigur e piesa aki lo bai bira un hit grandi pa Alex i agrupashon musikal Zudup Hopi Forsa.

 Mester bisa ku no ta Alex so a graba su piesa nobo, ‘E Mulina’, tin informashon ku tur kantante di e agrupashon musikal Zudup Hopi Forsa ta den studio di grabashon, esaki ta nifiká ku lo bai bin sigur 6 piesa nobo mas di Zudup Hopi Forsa riba merkado. Pero pa awor aki Alex Pieternella ta e promé ku su piesa ta bai zona na diferente radio emisora lokal.