Komishon Evaluashon Lei Finansiero a tene nan show den Punda

169
Punda—Komishon di Finansa den Parlamento,a tene un “deliberashon” ku e Komishon Evaluashon Lei di Konsenso Finansiero. Esaki den kuadro di un seri di entrevista ku e Komishon ta hibando na St. Maarten, Kòrsou i Hulanda.  Ya kaba nan a finalisá na Hulanda miéntras St. Maarten ta kla awe i Kòrsou ta inisiá awe tambe.

Raymond Gradus, presidente di e Kolegio di Supervishon Finansiero, Cft, ya kaba a menshoná públikamente ku e evaluashon di e leinan ta los for di e trayekto di supervishon, mirando ku ya kaba nan a stipulá un trayekto di mas aña pa Kòrsou por enkaminá. Polítikamente e deklarashon di Gradus ta un bòftá den kara di e komishon finansiero di Parlamento, debí ku e presidente di e kolegio ya a asumí ku tin un prolongashon den e lei sin mas, miéntras tampoko no a konsiderá ku e Komishon di Evaluashon mester papia promé ku parlamento di Kòrsou, konforme artíkulo 33 di e Lei Finansiero. Pa tal motibu, mañan, bishita di e Komishon di Evaluashon serka e Komishon Finansiero di Parlamento ta nada mas sino un “show” ya ku Cft a disidí riba nan mes ku e lei tei wòrdu prolongá pa 3 aña mas.